Քոչարյանի, Նարեկ Սարգսյանի ու Երվանդ Զախարյանի կերած փողերն ու դրսում անտուն մնացած կինն ու իր 6 երեխաները․ ակցիա Երևանում (լուսանկարներ)

Հյուսիսային պողոտան քաղաքի ամենաբանուկ ու շատերի համար գեղեցիկ վայրերից մեկն է, սակայն հիմա քչերը գիտեն, որ ժամանակին այդ պողոտան կառուցելու համար քանդեցին տարածքի տները, մարդկանց այդ տների դիմաց տվեցին կոպեկներ, ոմանց էլ՝ ոչ մի բան: Հիմա մենք քայլում ենք այդ պողոտայում, իսկ փոխարենը դրսում սովամահ են լինում մարդիկ, ովքեր այդ տների դիմաց չստացան ոչինչ։

Այսօր Երևանի քաղաքապետարանի դիմաց հավաքված տարեց մարդիկ պայքարում էին իրենց իրավունքների համար։ Պայքարող մարդկանց տները քանդեցին 2004 թվականին ու փոխարենը նրանց տվեցին կոպեկներ։ Ինչպես ակցիայի մասնակիցներից ոմանք էին նշում, «մեզանից հիմա շատերը մահացել են ու պայքարողներից մնացել ենք այս մի քանիսը»։

NEWSPRESS.am-ի հետ զրույցում ակցիայի մասնակից Ժենյա Պողոսյանը խոսեց ակցիայի նպատակի, պատճառների ու ակնկալիքների մասին։

«Մենք Հյուսիսային պողոտայի բնակիչներն ենք, ովքեր 2004 թվականից հետո ապրում են քաղաքի ծայրամասերում։ Պատկերացնո՞ւմ եք, մենք թողեցինք կենտրոնում գտնվող մեր տներն ու հիմա ապրում ենք քաղաքի ծայրամասերում։ Մենք ամեն օր գնում ենք նախագահականի, կառավարության ու քաղաքապետարանի դիմաց, սակայն մեր հարցին ոչ ոք լուծում չի տալիս։ Յուրաքանչյուր ընտրությունից առաջ մեզ կանչում են, նստեցնում սեղանների առաջ ու հարցնում, թե ով ինչքան գումար է ուզում ու հավելում են, որ ընտրություններից հետո այս հարցը կլուծվի, սակայն փաստացի արդեն 14 տարի է, ինչ մենք այս վիճակում ենք։ Մեզ լռեցնում են, ու մենք շարունակում ենք մեր պայքարը»։

Տիկին Ժենյան ընդգծեց, որ պայքարում են անարդարության դեմ ու ցանկանում են, որ մեղավորները պատժվեն, իսկ մարդիկ ստանան իրենց հասանելի գումարը։

«Տները քանդելուց հետո այդ ժամանակվա քաղաքապետ Երվանդ Զախարյանը հայտարարեց, որ մեկ քառակուսի մետրի համար տալու են 1000 ԱՄՆ դոլար, սակայն փաստացի մեզ տվեցին 230 դոլար։ Ստացվում է, որ 770 դոլարը որոշ մարդիկ կերան։ Մենք պայքարում ենք մեր գումարների տարբերությունը ստանալու համար։ Մենք խոսում ենք, բարձրաձայնում հարցի մասին, սակայն մեզ չեն լսում ու ասում են, որ բյուջեում փող չկա։ Մեզ նույնիսկ չեն ասում, թե մեր հարցին ե՞րբ լուծում կտան։ Մենք պայքարում ենք 15 թվականի Եղեռնի նման ու այդպես էլ չգիտենք, թե մեր հարցին երբ լուծում կտան»։

Ժենյա Պողոսյանն ընդգծեց, որ ակցիայի մասնակիցները ողորմություն չեն խնդրում, այլ պայքարում են արդարության համար։

«Մենք դիմում ենք Նարեկ Սարգսյանին, Ռոբերտ Քոչարյանին ու Երվանդ Զախարյանին, ովքեր քանդեցին մեր տներն ու կերան այդ գումարները։ Փոխարենը մեզանից շատերն ապրում են քաղաքի ծայրամասում, իսկ մեր մեջ կա կին, ով տուն չունի, ապրում է դրսում ու իր հետ միասին դրսում են նաև իր 6 երեխաները»։

Ակցիայի մասնակիցներն ընդգծեցին, որ պայքարելու են այնքան, մինչև այս հարցը լուծում ստանա և պատժվեն բոլոր նրանք, ովքեր կերել են այդ գումարները։