Նիկոլ Փաշինյանը լեգիտիմացնում է Սերժ Սարգսյանի վարչապետությունը

«Ժամանակ» թերթն այսօր գրել է, որ իր տեղեկություններով՝ «Ելք» խմբակցության ղեկավար Նիկոլ Փաշինյանը կառաջադրվի վարչապետի թեկնածու, և «Ելք» խմբակցությունը կսատարի նրան: Սա կլինի «Ելք»-ի փոխզիջումը Փաշինյանին, նրա հետ Ազատության հրապարակ չգնալու հարցում:

Նման քայլով Փաշինյանը նաև լեգիտիմացնում է Սերժ Սարգսյանի վարչապետությունը։ Ինչո՞ւ: Լինելով ընդդիմադիր պատգամավոր՝ այսօր նա որոշում է առաջադրել իր թեկնածությունը վարչապետի պաշտոնում և Սերժ Սարգսյանին ակամա «դարձնել»  արդար քվեարկության արդյունքում ընտրված վարչապետ: Սրանով ցույց է տրվում հայ և միջազգային հանրությանը, թե Սերժ Սարգսյան գործող նախագահն իսկապես ավելի նախընտրելի վարչապետ կլինի, քան «ամենաբարձրախոս» ընդդիմադիրը: 

Փոխարենը Փաշինյանը հրաժարվում է փողոցային վայրահաչություններից ու ամպագոռգոռ խոստումներից։ Ինքնին հասկանալի է, որ այս ամենը նա անում է մեծ ճնշման տակ, քանի որ իրեն բնորոշ գործելաոճից կարող էր հրաժարվել միայն յուղոտ պաշտոն ստանալու խոստումի դիմաց։ Ստացվում է այնպես, որ Հայաստանում կարելի է պաշտոն ստանալ միայն ձևական պաթոսային խոսքերով և բարձրախոսով հրապարակային սին ելույթներով հանդես գալու համար, և իհարկե, պաշտպանելով Սերժ Սարգսյանին: 

Ի վերջո, մեկ է, գումարելիների տեղը փոխելով, գումարը չի փոխվում, այսինքն՝ պաշտոններում անձերի փոփոխությունը չի հանգեցնում երկրի տնտեսական աճին, ժողովրդի սոցիալական պայմանների բարելավմանը, արտագաղթի աճի նվազման և գործազրկության կրճատման։ Լեգիտիմացնելով Սերժ Սարգսյանի վարչապետությունը՝ Փաշինյանն, ուղղակի, շարունակելու է նրա գործը՝ ձնագնդի էֆեկտի նման մեծացնելով ժողովրդի խնդիրները։ Այստեղ հարց է առաջանում՝ պարոն Փաշինյան, ձեր աշխատելաոճից, ցույցերից և պայքարի ակցիաներից ի՞նչ է փոխվել երկրում։ Ոչինչ։ Ի՞նչ եք արել պատգամավոր լինելուց ի վեր, ինչպե՞ս եք օգնել գյուղացուն, երբ վերջինիս, վաղահաս ու չկանխատեսված ցրտահարությունից հետո, մնացել են, լավագույն դեպքում, վարկերը, ի՞նչ եք արել ընդհանրապես պետության համար, բացի «լաչառ կնկա» պես ԱԺ ամբիոնից գոռգոռալով, մեկ-մեկ էլ փողոցում ցույցեր անելով։

Իսկ հիմա, տեսե՛ք, պիտի վարչապետ դառնա, որ նոր միայն կարողանա «գլոբալ» հարցեր լուծել։ Այստեղ ժողովուրդը կասեր՝ ախորժակիդ քացախ։

«Հրապարակ» օրաթերթի տեղեկություններով էլ՝ ԱԺ կանոնակարգ-օրենքի համաձայն, հատուկ նիստով տեղի կունենա բաց կամ, այսպես կոչված՝ անվանական քվեարկություն․ այս կարգն ի սկզբանե ամրագրվել է՝ հաշվի առնելով միապետ Սերժ Սարգսյանի անձը, որպեսզի հետո իրեն չքվեարկածների «հախից գա»։

NEWSPRESS.am