Ծաղկաձորի քաղաքապետի տունը թալանել են. նա դիմել է և՛ իրավապահներին, և՛ «գողականներին»

Օրերս NEWSPRESS.am-ին է դիմել Ծաղկաձորի մի բնակչուհի, ով որոշ տեղեկություններ ունի Ծաղկաձորի քաղաքապետ Արթուր Հարությունյանի տնից կատարված գողության մասին։ Բնակչուհին խնդրեց առայժմ չբացահայտել իր ինքնությունը, բայց վստահեցրեց, որ ունի որոշ տվյալներ կատարվածի մասին։

Նա ասաց նաև, որ շուտով կունենա ավելի ստույգ տեղեկություններ այն մասին, թե ինչպես և ովքեր են կատարել գողությունը։ Կինը նշեց նաև, որ գողությունը կատարողների ինքնությունը կբացահայտի փաստերով։ Նա NEWSPRESS.am-ին կտրամադրի նաև տեսանյութ։

Նկատենք, որ Ծաղկաձորի քաղաքապետի տնից գողություն է կատարվել, որն ինքը՝ քաղաքապետը, հերքում է։ Սակայն, ինչպես մեզ հավաստիացրեց մեր զրուցակիցը, դեպքը տեղի է ունեցել 03․01.18 թ., որից հետո քաղաքապետը դիմել է և՛ քրեական աշխարհի, և՛ իրավապահների օգնությանը։ Գործին ընթացք է տրվել՝ գործը քննվում է։

Այդ մասին լուրը չհերքեց նաև գործով քննիչը։ Նա նշեց, որ գործով ձերբակալվել է 3 անձ, սակայն այլ մանրամասներ չհայտնեց, ինչպես նաև չխոսեց այն մասին՝ գողոնն ամբողջությա՞մբ է վերադարձվել տուժողին, թե՞ ոչ։

Հավելենք միայն, որ մինչ այդ, գործի առնչությամբ մեզ իր մտահոգությունը հայտնած կինը նաև տեղեկացրել է, որ քաղաքապետը, բացի ոստիկանությունից, դիմել է նաև քրեական աշխարհի օգնությանը։

Մասնավորապես, խոսքը ոմն Գոռի մասին է, ում միջոցով գողոնը վերադարձնելու քայլեր է կատարվել։

Գողության հետ կապված մանրամասները կներկայացնենք շուտով։