«Աղոթի՛ր, Ստեփանոս, աղոթ՛իր․․․»․ ջահել չես մնա, ծերություն կգա

Որոշ հոգեբաններ համարում են, որ մարդու հասունությունն սկսում է 40 տարեկանից, մյուսները նույնիսկ ավելի փոքր տարիք են նշում՝ 30-ը։ Չնայած դրան՝ 45 տարի բոլորած ՀՀԿ-ական Կարեն Ավագյանն այդպես էլ չի հատում այդ շեմն ու չի հասունանում։ Նա, ինչպես եղել, այնպես էլ մնում է Հանրապետականի երիտասարդների ղեկավարը։ Իսկ ավելի կոնկրետ՝ նա Հանրապետականի «հավերժ ջահելն» է, ում կարող են ասել՝ «ջահել ջան, հելի մի հատ էս ինչ բանն արա մեզ համար», ու «փուչիկ» Կարենն անմիջապես գործի է անցնում՝ փնովելով ինչ-որ մի բան կամ ինչ-որ մեկի, կամ հակառակը՝ գովաբանելով։

Կարող են լինել նաև «հատուկ հանձնարարություններ», որտեղ Ավագյանը մի քիչ ավելի ջանք ու եռանդ պետք է ներդնի, որպեսզի փուչիկի նման չպայթի կամ կրակից չվառի իրեն։

Այս վիճակը նրան ձեռք է տալիս, քանի որ արջի ծառայություն մատուցելը, կամ Հանրապետականի «մանկլավիկ» լինելն Ավագյանի համար կենարար նշանակություն ունի․ սողում է առաջ գնալու համար, օճառվում՝ չվնասվելու համար, ՀՀԿ-ի հովանու ներքո քողարկվում է անընդհատ գռփելու և սովից չմեռնելու համար։

Իհարկե, շատերը գիտեն, թե իր ճանապարհին փողի ինչ աղբյուրներից է օգտվում ծարավը չհագեցնող Ավագյանը։ Մասնավորապես, խոսքը նրա՝ դրամաշնորհային ծրագրերի մասին է, որոնք գալիս են կառավարությունից ու տրվում նախագահի աշխատակազմի կողմից։

Ի դեպ, փողերի լվացումը քողարկելու համար, Կարեն Ավագյանը հետաքրքիր տարբերակ է ընտրել։ Նա իր ունեցվածքը բարեկամների, կնոջ ու զոքանչի շաբլոն դարձած տարբերակի փոխարեն, ընտրել է հակառակ ձևաչափը՝ բարեկամի անունից կլորիկ գումարներ է նվիրատվություն անում ինքն իրեն։

Ըստ հայտարարագրի՝ Կարեն Ավագյանը մեկ տարվա ընթացքում ունեցել է մոտ 30 մլն դրամի եկամուտ` մի մասը աշխատավարձի, մի մասը` «այլ եկամուտների», մի մասն էլ` ստացված փոխառությունների և նվիրատվությունների տեսքով:

Ու որքան էլ նա իր պայծառ, ջինջ և թափանցիկ աչքերով ու ոչինչ չասող հայացքով հանդես գա հակակոռուպցիոն կոչերով, միևնույնն է՝ կոռուպցիան հենց իր տակն է։ Ու եթե այսօր Ավագյանի հնարքներն ու «ժուլիկությունը» ներվում է ու չտեսնելու է տրվում, քանի դեռ նա «ջահել» է, ապա վաղն արդեն նույն հաջողությունը չի տրվի նրան, երբ ՀՀԿ-ում, այնուամենայնիվ, հասկանան, որ իրենց «ջահել»-ը, վաղուց արդեն ծերացել է ու դարձել անպետք։ Հատկապես, երբ որոշ լուրերի համաձայն, արդեն սկսել են փորփրել Կարեն Ավագյանի գործերն ու փոս փորել նրա համար։

Այնպես որ, մնում է հորդորել ու հուսադրել իրեն հավերժ երիտասարդ համարող Ավագյանին՝ «Աղոթի՛ր, Ստեփանոս, աղոթ՛իր․․․», ջահել չե՛ս մնա, ծերություն կգա։

NEWSPRESS.am