ԵՀՄՖ-ն Հայաստանում մարդու իրավունքների խախտումների մասին նամակներ է հղել SEMMO-ին և ՄԻՄՖ-ին

ԵՀՄՖ նախագահությունը NEWSPRESS.am-ի միջոցով նամակ է հղել Հարավ-արեւելյան Եվրոպայի մեդիա-կազմակերպությանը՝ SEEMO-ին (South East Europe Media Organisation)-ին իրազեկելով Հայաստանում մարդու իրավունքների ոտնահարումների բազմաթիվ փաստերի մասին: Կազմակերպությունից օպերատիվորեն ստացվել է նամակի պատասխանը (տե՛ս 1,2-րդ նկարներում):

ԵՀՄՖ նախագահությունը նամակ (տե՛ս 3-րդ նկարում) է հղել նաև Մարդու իրավունքների միջազգային ֆեդերացիայի նախագահ Դիմիտրիս Քրիստոփոլոուսին, որում, մասնավորապես ասված է. 

«Մեծարգո պարոն նախագահ,

Եվրոպայի հայկական միությունների ֆորումի (ԵՀՄՖ) նախագահությունը ստիպված դիմում է Ձեզ Հայաստանի Հանրապետությունում պետական պաշտոնյաների կողմից մարդու տարրական իրավունքների ոտնահարման բազմաթիվ փաստերի առնչությամբ:

ՀՀ դատաիրավական համակարգն իր բացահայտ անօրինական գործողություններով բազմիցս է ապացուցել, որ այն այսօր չի իրականացնում ՀՀ Սահմանադրությամբ իրեն վերապահված արդարադատության երաշխավորի գործառույթներն, այլ ցինիկորեն արհամարհելով ՀՀ քաղաքացիների տարրական իրավունքները՝ կատարում է բռնապետության կայունությանը և շահերի պաշտպանությանն ուղղված գործողություններ:

Քաղաքական և այլակարծության դրդապատճառներով կալանավորված անձանց առկայության փաստը Հայաստանի իշխանությունները պատճառաբանում են նրանով, որ որոշ ընդդիմադիր հայացքներ ունեցող անձինք ձերբակալվել են ոչ թե քաղաքական հայացքների, այլ հասարակական կարգուկանոնը խախտելու համար: Իսկ այն քաղաքական և հասարական գործիչները, ովքեր իրենց ելույթներում բացեիբաց նշել են, որ Սերժ Սարգսյանի հաստատած ռեժիմը դարձել է ազգային անվտանգությանը սպառնացող գործոն, ենթարկվում են դատական ռեպրեսիվ գործողությունների, նրանց դեմ հարուցվում են մտացածին քրեական գործեր, որոնց հիմնական նպատակն է զրկել մարդկանց ազատությունից և իրականացնել քաղաքական հաշվեհարդար:

ԵՀՄՖ-ը բազմիցս զգոնության, սթափվելու և դատապարտման կոչեր է արել ՀՀ վարչախմբին՝ փորձելով կասեցնել քաղբանտարկյալների նկատմամբ ծավալվող պետական հակաիրավական և հակամարդասիրական գործողությունները, սակայն ինչպես հարիր է ցանկացած բռնապետության, այն դարձել է առավել ցինիկ՝ բազմապատկելով արհամարհանքը ՀՀ քաղաքացիների իրավունքների հանդեպ:

Տվյալ հանգրվանում, որպես ՀՀ վարչախմբին կարգի հրավիրելու միջոց, ԵՀՄՖ նախագահությունը խնդրում է Մարդու իրավունքների միջազգային ֆեդերացիայի (FIDH - Fédération internationale des ligues des Droits de l’Homme) ղեկավարությանը իր կողմից Հայաստանի Հանրապետություն փաստահավաք դիտորդներ ուղարկել, որպեսզի հնարավոր լինի տեղում ուսումնասիրել պետական պաշտոնյաների կողմից մարդու իրավունքների խախտման բացահայտ դրսևորումները, քաղաքական հայացքների համար դատապարտված անձանց հանդեպ կատարված դատաիրավական անօրինականությունները և օրենքները կեղծելով դրանց իրավական հիմքեր տալու փաստերը:

Վերջին օրերս ականատես եղանք ՀՀ ազնիվ քաղաքացիների նկատմամբ դատական ֆարսերի միջոցով հաշվեհարդարի բացահայտ դրսևորման դեպքերի: Թիրախ էին ընտրված Հայրենիքի հանդեպ ծառայության և ժողովրդավարության հարցերում մեծ վաստակ ունեցող գործիչներ Ժիրայր Սեֆիլյանը, Սամվել Բաբայանը, Կարո Եղնուկյանը, Գևորգ Սաֆարյանը, Շանթ Հարությունյանը և բազմաթիվ այլ ազգային նվիրյալներ:

Հայկական բռնապետության ցինիզմը հասել է այն աստիճանի, որ արդեն օրենսդրորեն խեղվում են փաստաբանների տարրական իրավունքները, որով փորձ է արվում լռեցնել այն փաստաբաններին, որոնք համարձակություն են ցուցաբերում պաշտպանել քաղբանտարկյալների շահերն և ի ցույց դնել սարքովի մեղադրանքների իրավական բացահայտ սնանկությունը:

Մեծարգո նախագահ, մեկ անգամ ևս խնդրում ենք ձեռնարկել սթափեցնող և զսպող քայլեր հայկական բռնապետության դեմ, որը վերջերս հայտարարեց եվրոպական քաղաքական-իրավական համակարգին ինտեգրվելու ցանկություն և ստորագրեց համապատասխան փաստաթուղթ, սակայն իրականում շարունակում է գործել որպես բռնապետություն»: