Մի քանի տող «ՊՍԺ»-ի անողնաշար ու թուլամորթ ֆուտբոլի մասին

Երեկ Չեմպիոնների լիգայի 1/8-րդ եզրափակչի պատասխան խաղում «Մադրիդի Ռեալը» հյուրընկալվեց «ՊՍԺ»-ին»: Այս խաղում նույնպես մադրիդցիները թելադրեցին իրենց ֆուտբոլը, հաղթեցին ու ևս մեկ անգամ ապացուցեցին, որ թիմային ոգին ու միլիոնները կանգնած են տարբեր հարթության վրա։

Ստացվեց այնպես, որ ֆրանսիական թիմն առանց Նեյմարի ավելի քիչ գնդակ ընդունեց սեփական դարպասը։ Հանդիպումից առաջ սպորտային պարբերականները գրում էին, որ Փարիզում շատ մեծ ճակատամարտ է տեղի ունենալու, սակայն հանդիպումից հետո ամեն ինչ այլ դարձավ։ Հանուն արդարության պետք է նշել, որ փարիզյան ճակատամարտին հավատում էին միայն փարիզյան թիմի երկրպագուներն ու համախոհները։

Հանդիպումից հետո մասնագետները նշեցին, որ «ՊՍԺ»-ում թիմային ոգի ու թիմ չկա, այլ այնտեղ մարդիկ են, ովքեր հավաքվել են մեկ վայրում, ունեն շատ մեծ տրանսֆերային գին, ստանում են շատ բարձր աշխատավարձ ու կարողանում են հաղթել Ֆրանսիայի առաջնության թիմերին։

Ամենաազդեցիկն Արիգո Սակիի քննադատությունն էր, ով նշել էր, որ «ՊՍԺ-ն խաղացողների խումբ է, իսկ գաղափարը չես կարող փոխարինել գումարի հետ»։

Այս պարտությունից հետո արդեն պարզ է, որ ամռանը թիմը կլքի Էմերին, և վերջապես փարիզյան թիմի ղեկավարները կհասկանան, որ աստղաբաշխական թվերով տրանսֆերներ իրականացնելը, մեծ աշխատավարձ բաժանելն ու գումար սիրող ֆուտբոլիստներին թիմ հրավիրելը չի կարող ձևավորել թիմային գաղափար ու ոգի։

 NEWSPRESS.am Sport