Սերժ Սարգսյանի քաղաքական ինտրիգն ու ընդդիմության անհաջող պայքարը

Սերժ Սարգսյանի վերարտադրությունը թույլ չտալու նախաձեռնությունը չի հաջողվի։

Հաշվի առնելով, որ դրված է սուպերվարչապետի հարցը՝ իշխող կուսակցությունն իր ղեկավարի հետ միասին մեծ ուշադրություն է դարձնելու խոչընդոտող հանգամանքների վրա և ամեն ինչ անելու է, որ Սերժ Սարգսյանն ընտրվի ՀՀ վարչապետ։

Ի վերջո, մեծ հաշվով, իմաստ չունի ՀՀԿ-ից առաջարկել վարչապետի մեկ այլ թեկնածու՝ զուտ այն պարզ պատճառով, որ ՀՀԿ-ից ցանկացած մեկը պետք է ենթարկվի Սերժ Սարգսյանի կարգադրություններին, քանի որ Սարգսյանը մնալու է որպես ՀՀԿ ղեկավար։ Սարգսյանը հանդիսանում է այն բուրգի գագաթը, որից ձևավորված է երկիրը ղեկավարող համակարգը։ Այսինքն ՝ Սերժ Սարգսյանի՝ վարչապետ ընտրվել-չընտրվելու հարցը խնդիրը չի փոխի, քանի դեռ համակարգային կլանը նույնն է: Կլան, որի նպատակն է թիրախավորել իր առջև դրված նպատակները խոչընդոտել ցանկացող ուժերին։

Թերևս դրանով է բացատրվում նաև Սերժ Սարգսյանի քաղաքական վարքագիծը, որի համաձայն՝ նա իր շուրջ պահում է ինտրիգը՝ իր գործողությունների մասին հայտնելով միայն վերջին պահին։

Այդպես եղավ նախագահի թեկնածուի առաջադրման ժամանակ, այդպես է նաև վարչապետի թեկնածուի առաջադրման հետ կապված հարցում։ Սերժ Սարգսյանը պահում է ինտրիգը՝ արհեստականորեն երկարաձգելով թեկնածուի առաջադրման ժամկետը։

Թերևս նա ինտրիգը պահում է նաև ընդդիմության օգնությամբ։

Հայտարարելով Սարգսյանի կառավարման երրորդ փուլի մասին ու փորձելով առաջադրել իր թեկնածուին՝ ընդդիմությունն իրականում Սարգսյանի վարչապետությունը լեգիտիմացնում է՝ միաժամանակ պահելով իր ընդդիմադիրի ստատուսը։

Ի վերջո, որևէ քաղաքական ուժ Ազգային ժողովում չի կարող իսկապես ընդդիմանալ. նրանց քվեն ոչինչ չի փոխի և միայն կլեգիմիտացնի Սերժ Սարգսյանի վարչապետությունը:

Ինչ վերաբերում է փողոցային պայքարին, ապա այստեղ առավել ևս հաջողություն չի լինի․ քանի որ նույնիսկ գնաճի դեմ պայքարը չստիպեց մարդկանց փողոց դուրս գալ ու միանալ Փաշինյանին։ Իսկ, հատկապես այս դեպքում, Նիկոլ Փաշինյանն իրականում պայքարում է ո'չ թե ՀՀԿ-ի, այլ Սերժ Սարգսյանի իշխանության գալու դեմ։

Ու ինչպես արդեն նշեցինք, եթե նույնիսկ Սարգսյանը փաստացի չղեկավարի երկիրը, ապա դա լինելու է Հանրապետականից մեկ ուրիշը, ինչն, ըստ էության, նույնն է, թե ղեկավարի Սարգսյանը:

Իսկ եթե ընդդիմությունը նույնիսկ ո՛չ թե իր պայքարով պահում է Սարգսյանի քաղաքական ինտրիգն ու օգնում նրան, այլ իսկապես ուզում է պայքարել նրա դեմ, ապա պայքարում է անհաջող, ու պայքարն ի սկզբանե դատապարտված է ձախողման:

NEWSPRESS.am