«Նոր եմ եկել, հետո կզանգեք էլի»․ «Մարիաննա»-ի տնօրենը խուսափեց որդու մասնակցությամբ վրաերթի մասին խոսելուց

«Մարիաննա» կաթնամթերքի ընկերության գլխավոր տնօրեն Տիգրան Վարդանյանը հերքում է լուրերն այն մասին, թե իր տղան վրաերթի ենթարկել հետիոտնի։

Shamshyan.com-ի տեղեկություններով՝ ոստիկանությունը պարզել է, որ մեքենայի ղեկի առաջ եղել է «Մարիաննա» կաթնամթերքի ընկերության գլխավոր տնօրեն Տիգրան Վարդանյանի տղան` 26-ամյա Ժորա Վարդանյանը, ում ավտոմեքենայում հայտնաբերել են նաև «Մակարով» տեսակի ատրճանակ։

Չնայած դրան՝ NEWSPRESS.am-ի հարցին ի պատասխան՝ Տիգրան Վարդանյանը նշեց, որ դեպքն իր որդու հետ կապ չունի։

«Ես նոր եմ եկել քաղաք, «Զվարթնոց»-ում եմ, չգիտեմ՝ ինչ է եղել, բայց որդուս հետ կապ չունի, վարորդի հետ է կապված»,- մտացրիվ պատասխանեց Տիգրան Վարդանյանը։

Ճշտող հարցին, թե հերքո՞ւմ է արդյոք նա տեղեկությունն այն մասին, որ ղեկին իր տղան է եղել, Վարդանյանն, ըստ էության, չպատասխանեց․ «Նոր եմ եկել, հետո կզանգեք էլի․․․․»,-ասաց ու անջատեց հեռախոսը։

ՀՀ քննչական կոմիտեից էլ հայտնել են, որ «ՀՀ ոստիկանության Մալաթիայի բաժին է ներկայացել մի քաղաքացի և հայտնել, թե վրաերթը կատարել է ինքը: Նույն օրը վերջինս ձերբակալվել է»։ Ոստիկանության տարածած հաղորդագրության համաձայն էլ՝ այդ քաղաքացին 42-ամյա տղամարդ է, ով հայտնել է, որ Մ.Գրիգորյանին ինքն է վրաերթի է ենթարկել, իր վարած նշված «Մերսեդես» մակնիշի ավտոմեքենայով:

Չի բացառվում, որ Տիգրան Վարդանյանն առայժմ զերծ է մնում ավելորդ մեկնաբանություններից՝ որդուն փորձանքից ազատելու համար։ Հարկ է նկատել նաև, որ այնպիսի տպավորություն է, թե «Մարիաննա» ընկերություննում բոլորին հրահանգված է Վարդանյանների հետ կապված հարցերին տալ միևնույն պատասխանը՝ «չգիտեմ, տեղյակ չեմ»։ Ամեն դեպքում հարուցվել է քրեական գործ, և պարզվում են դեպքի հանգամանքերը։

Հիշեցնենք, որ մարտի 10-ի ուշ երեկոյան «Mercedes G 63» մակնիշի ավտոմեքենայի վարորդը Վազգեն Սարգսյան փողոցում՝ ՀՀ կենտրոնական բանկի դիմաց, վրաերթի է ենթարկել փողոցն անզգուշաբար անցնող հետիոտնին ու դիմել փախուստի։ Ավելու ուշ պարզվել է, որ վրաերթի ենթարկվածը 75-ամյա Մարիա Գրիգորյանն է, ով «Զվարթնոց» օդանավակայանի գլխավոր տնօրենի կնոջ մայրն է։

Մեքենայի հարվածից կինը հայտնվել է ճանապարհի թույլատրելի հատվածում կայանած «Toyota Camry» մակնիշի ավտոմեքենայի անիվների տակ և տեղում մահացել է: