«Լևոն Տեր-Պետրոսյանը համբուրեց իմ ձեռքը, սակայն․․․․»․ Գարեգին Նժդեհի եղբոր դստեր բնակարանի անօրինությանը, ըստ նրա, մասնակցել է ոստիկան

NEWSPRESS.am-ն արդեն մեկ անգամ անդրադարձել է Գարեգին Նժդեհի եղբոր դստեր խնդրին, ով անօրինության զոհ էր դարձել ու արդեն մի քանի տարի է, ինչ ապրում է մետրոյի «Մարշալ Բաղրամյան» կայարանի մոտ՝ դրսում, որի դիմաց նախագահի նստավայրն է։ 

NEWSPRESS.am-ի հետ զրույցում Գարեգին Նժդեհի եղբոր դուստր տիկին Էմմա Սահակյանը նշեց, որ վերջին շրջանում մամուլում հայտնվում են լուրեր ու տեղեկություններ այն մասին, որ իբր նա Նժդեհի եղբոր դուստրը չէ։ Նա անդրադարձավ նաև իր խնդրին ու պատմեց այդ մասին նոր մանրամասներ։

«Ես ունեմ բոլոր փաստաթղթերը ու կարող եմ ցանկացած պահի ցույց տալ, որ մարդիկ տեսնեն ու հավատան, թե ով եմ ես ու ում եղբոր դուստրն եմ։ Ես նախագահին ուղարկել եմ 17 նամակ ու այդ նամակներին կցել եմ նաև իմ հոր փաստաթղթերը։ Ես այսօր քաղաքապետարան էի գնացել ու հանդիպեցի փոխքաղաքապետի հետ ու նրանցից ոչ ոք ինձ չփոխանցեց քաղաքապետի կամ նրա քարտուղարուհու հեռախոսահամարը։ Ես մի քանի անգամ հանդիպել եմ Տարոն Մարգարյանի հետ ու նա ամեն անգամ ասում է, որ չի մոռացել իմ խնդրի մասին ու կլուծի այդ հարցը։ Սակայն արդեն մի քանի տարի է, որ ես դրսում եմ, նամակները գնում են Տարոն Մարգարյանին, ու ամեն ինչ անօգուտ է»։

Տիկին Էմման նշեց, թե ինչ հանգամանքներում են իր ձեռքից վերցրել բնակարանն ու խոսեց նաև, թե այս հանցավոր գործում ովքեր կան։

«Անօրինության հետևանքով ես հայտնվել եմ դրսում։ Ես ապրել եմ Օրբելի փողոցում ու առանց ինձ տեղեկացնելու հանել են գրանցումից։ Այդ բնակարանն իմ քրոջ բնակարանն էր և ես 14 տարի գրանցված եմ եղել ու ապրել այդ բնակարանում։ Ես խնամում էի քրոջս, իսկ քույրս ժառանգ չուներ, ու նրա մահից հետո ինձ հանեցին գրանցումից ու բնակարանը վաճառեցին։ Այդ բնակարանն արժեր մոտ 70 հազար դոլար, իսկ ներսում գույք, թանկարժեք իրեր ու զարդեր կային։ Ինձ հուլիս ամսին դուրս գցեցին ու ես հայտնվեցի փողոցում։ Միակ բանը, որ ունեի, դա իմ հագի շորերն էին։ Իսկ այդ անօրինական գողության կատարմանն օգնել է ոստիկան։ Ես ունեմ բոլոր փաստերը»։

Տիկին Էմման նշեց, որ ամեն անգամ, երբ նա նամակ է ուղարկում քաղաքապետարան, նրան ուղարկում են նույն պատասխանը։ Նա ընդգծեց, որ այնպիսի տպավորություն է, կարծես թե այդ թուղթը պատճենահանում են ու ամեն անգամ ուղարկում։

«Քաղաքապետն ասում է, որ բնակարան չկա, սակայն նախանցյալ տարի քաղաքապետն ինքն ասաց, որ տվել է 650 բնակարան, իսկ անցյալ տարի նա բնակարաններ բաժանեց երգիչ-երգչուհիներին ու էստրադայի աստղերին։ Այնպիսի տպավորություն է, կարծես թե երգիչներն, իրոք, անտուն էին մնացել ու բնակարանի կարիք ունենին։ 2008 թվականին էլ իմ խնդրի մասին խոսեցի Լևոն Տեր-Պետրոսյանի հետ։ Նա մարտի 1-ից հետո տեղի ունեցած ցույցերի ժամանակ խոսեց Նժդեհի մասին, ես բեմ բարձրացա ու շնորհակալություն հայտնեցի, իսկ նա համբուրեց իմ ձեռքը։ Ցավոք, այդ ժամանակ նա նախագահը չէր, հակառակ դեպքում նա կլուծեր իմ բնակարանի հարցը»։

Տիկին Էմման ընդգծեց նաև, որ նա դիմել է «Առաջին ատյանի», «Վերաքննիչ» ու «Վճռաբեկ» դատարաններ, սակայն ամեն ինչ այն է, ինչ կա։