Մարդ, ով ֆուտբոլում ավելի շատ տվել է վնաս, քան թե օգուտ․ Պատճառներ, թե ինչո՞ւ է քանդվում Ժոզե Մոուրինյոյի ավտոբուսը

Անգլիայի «Մանչեսթեր» քաղաքը սգում է։ Երեկ իսպանական «Սևիլիան» կարողացավ հաղթել «Յունայթեդին»։ Այս հաղթանակին միգուցե չէին հավատում անգամ իսպանական ակումբի երկրպագուները։ Սակայն փաստացի «Սևիլիան» Չեմպիոնների լիգայի մրցաշարից դուրս թողեց Ժոզե Մոուրինյոի սաներին։ Փաստացի Ժոզեի թիմը երեկ տապալվեց, իսկ եթե ավելի լայն դիտենք, ապա Ժոզեն տապալեց ամբողջ մրցաշրջանը։

NEWSPRESS.am Sport-ը ներկայացնում է, պատճառներ, թե ինչու Ժոզե Մոուրինյոն կամաց-կամաց սպառում է իրեն։

Պորտուգալացի մարզիչն անկախ ամեն ինչից ամենաքննարկվողներից է ու յուրաքանչյուր թիմ անկախ ամեն ինչից կցանկանար, որ թիմը մարզի պարոն Ժոզեն։ Եթե մի քանի տարի առաջ Ժոզեն համարվում է ֆուտբոլային աշխարհում նորամուծություններ մտցնող մարզիչ, ապա հիմա Ժոզեն փաստացի տապալում է։

Նախորդ մրցաշրջանում «Մանչեսթերը» նվաճեց մի շարք տիտղոս։ Պարոն Ժոզեն կարողացավ փակել մի քանիսի բերաններն ու նշել, որ քննադատությունների դիմաց նա մասնագետներին ու երկրպագուներին կնվիրի իր նվաճած տիտղոսները, սակայն այս տարի նա նվիրելու ոչինչ չունի։ Եթե մի քանի տարի առաջ ավտոբուսային մարտավարությամբ կարելի էր հարցեր լուծել, խաղեր հաղթել, մրցանակներ նվաճել, ապա հիմա անանցանելի պաշտպանություն չկա։ Յուրաքանչյուր պատնեշի դիմաց կա ճեղքող հարձակվողական գիծ։ Դա լավագույնն ապացուցում է Պեպ Գվարդիոլայի «Մանչեսթեր Սիթին»։ Պեպի թիմն ուղղակի քանդում է յուրաքանչյուր մրցակցի պաշտպանություն։ Իսկ ժամանակակից ֆուտբոլում ավտոբուսային մարտավարությունը կարող է աշխատել շատ քիչ, քանի որ կան Պեպի ու Զիդանի պես հանճարեղ մարզիչներ։

Իսկ եթե ավելի խորը գնանք, ապա շատ թիմեր կամաց-կամաց անցնում են 3 պաշտպանով խաղի։ Իսկ 4 պաշտպանի խաղով խաղալու ժամանակ պաշտպանական գործողությունների մասնակցում են հիմնականում կենտրոնական պաշտպաններն ու հետ քաշված հենակետային ֆուտբոլիստը։

Մյուս կողմից շատ դժվար է թիմի բոլոր հարձակվողներին համոզել, որ պաշտպանվեն 90 րոպե շարունակ։ Մասնավորապես, ամբողջ կյանքում հարձակվողական ֆուտբոլ խաղացած Ալեքսիս Սանչեսին, Ռոմելու Լուկակուին ու «Մանչեսթերի» մյուս հարձակվողներին դժվար է ստիպել, որ խաղան պաշտպաններ։ Այդ պարագայում կամ ֆուտբոլիստը դադարում է լինել հարձակվող (Սանչես, Մխիթարյան), կամ դառնում է թիմի համար անհասկանալի ֆիգուր։ Տվյալ դեպքում անգլիական ակումբում հիմնավորված է միայն պաշտպանների խաղը, ովքեր պարոն Ժոզեի կարգադրությամբ պաշտպանվում են։

Մյուս կողմից Մոուրինյոն դադարել է կատարել տակտիկական ու սխեմատիկ նորամուծություններ։ «Մանչեսթերի» գրեթե բոլոր խաղերը միանման են։ Թիմի կազմում հայտնվում են տարբեր ֆուտբոլիստներ, սակայն փաստացի ակումբը խաղում է միապաղաղ, սառը, ու խեղճ ֆուտբոլ։ Այդ խեղճության դեմ պայքարում երեկ հաղթեց «Սևիլիան»։ Ժոզեն կորցրել է նաև ֆուտբոլիստներ ընտրելու կարողությունը։ Նա մեկնարկային կազմ ընտրելիս շատ ժամանակ առաջնորդվում է այդ օրվա տրամադրությամբ։ Իսկ շատ ժամանակ ֆուտբոլային մասնագետները նշում են, որ Ժոզեն ֆուտբոլի պատմության մեջ ավելի շատ վնաս է տվել, քան օգուտ։ Նա սիրում է նվաճել տիտղոսներ, ու տիտղոսներից 3 անգամ շատ ֆուտբոլիստներն կոտրել (Ռաուլ, Կասիլիաս, Կակա և այլն․․․․)։

Հանդիպումից հետո շատերը սկսեցին ծաղրել թիմին, Ժոզեին ու տեղադրեցին քանդված ավտոբուսի լուսանկարներ։ Ժոզեի ավտոբուսը կամաց-կամաց քանդվում է։ Այդ ավտոբուսի փլատակային վիճակի մասին է խոսում թիմի տապալված մրցաշրջանը։ Մեղմ ասած նախորդ մրցաշրջանում «Մանչեսթերը» շատ բաների չհասավ։ Ժոզեին պետք է թարմություն, նորամուծություն ու մարզական աշխատանքի փոփոխություն։ Իսկ միգուցե նա շատ է հոգնել ու մի քանի ամիս հանգիստը նորից կվերականգնի պորտուգալացու միտքը։Իսկ փաստացի կարող ենք ասել, որ Ժոզեն իրեն սպառել է։