Աստված պահի բալեքիդ… ո՞նց էր համը մեր ձագի

NEWSPRESS.am-ի հիմնադիր-տնօրեն Արմենուհի (Արիանա) Հովսեփյանը ֆեյսբուքյան իր էջում գրել է.

«ԱԺ պատգամավոր, տխրահռչակ Միհրան Պողոսյանն օրենք է հեղինակել, որ իր որդիները բանակ չգնան: Տղաները կասեն՝ օրենք գրող պապան, պապան կասի՝ «քանի ես կամ, դուք պրոբլեմ չունեք»:

Նրանք հարուստ են և ունեն իշխանություն, կարող են անել այդպիսի բաներ: Վարքերն ու բարքերն են այդպիսին:

Նախորդ տարի՝ ընտրություններից առաջ, բանանային գեներալը հանրահավաքներ էր անում և իրեն գովելու համար պարտադրել էր, որ զոհված, պատերազմի ժամանակ զոհված զինվորների մայրերը գան ու գովեն իրեն:

Ստացվում է, որ եթե Միհրան Պողոսյանի որդին իր նման հարուստ պատգամավոր հայրիկ ունի, կարող է իրեն թույլ տալ սովորել Լոնդոնում, հայրն էլ այստեղ հանուն որդու օրենք գրել, որ որդին բանակ չգնա, իսկ, ա՛յ, աղքատն ու սովածը, բանվորի որդին ու խեղճը պետք է մեռնեն: Ի դեպ, կան մահեր, որոնք հանուն Հայաստանի էլ չեն: Կան մահեր, որոնք հանուն այս օլիգարխների են: Հավանաբար, Միհրան Պողոսյանը երազում կտեսնի զոհված զինվորների մայրերին, որոնք նրան թումանյանական հարց կտան.

«Աստված պահի քո բալին, ո՞նց էր համը իմ ձագի»:

Ժամանակն ու բարքերն են այդպիսին: Այնպիսին, որ Միհրան Պողոսյանի նմանը կարող է օրենք գրել: Այնպիսին, որ Միհրան Պողոսյանն ամբողջ ազգի հաշվին միլիոնավոր դոլարներ վաստակեց ու բանտի փոխարեն գործուղվեց Ազգային ժողով: Այնպիսին, որ բանտում ղումար խաղալու փոխարեն՝ օրենք է գրում ու մարդկանց ճակատագրերի հետ է խաղում:

Սա Հայաստանն է, որտեղ ատելության մթնոլորտը մեր երկնքից կախվել է, ու չեն թողնում մեզ շնչենք հենց միհրանպողոսյանների պատճառով: Միհրան Պողոսյանն ու իր նմաններն իրենց թունոտ ձեռքերով փակել են երկրի օդն ու խեղդում են մեզ գարշահոտության մեջ:

Ու սրա նման մարդակերների համար մեղավոր ենք մենք, որովհետև մեր հասարակությունը մի կտոր հացի, մի փոր հացի համար տարիներ շարունակ հանդուրժել է սրանց տեսակն ու թողել ավելի խեղդեն մեզ….

Բայց հաջորդ անգամ զոհված զինվորի մայրերի աչքերի մեջ նայել չի կարողանա, որովհետև նա իր որդուն վեր դասեց հանուն իրեն զոհվածներից…

Բայց հուսալքվել պետք չէ, ամեն ինչ, անգամ Միհրան Պողոսյանն ու այս մարդակեր համակարգն իրենց վերջն ունեն…»: