Պարո՛ն Աղվան, ես ի՞նչ էի արել՝ հայրս գործարա՞ր չէր, պապս էլ գողակա՞ն

NEWSPRESS.am-ի հիմնադիր-տնօրեն Արմենուհի (Արիանա) Հովսեփյանը ֆեյսբուքյան իր էջում գրել. 

«Քննչական կոմիտեն ստորագրությամբ ազատ է արձակել «Մարիաննա» կաթնամթերքի գործարանի տիրոջ 26-ամյա տղային, որը քաղաքի կենտրոնում՝ Կենտրոնական բանկի դիմաց «յաշիկ» բռաբուսով վրաերթի էր ենթարկել թոշակառու կնոջն ու լքել դեպքի վայրը:

Բայց դեպքի վայրը լքելուց բացի, օլիգարխ գործարարի «հաբռգած տղան» 40-ամյա մի «հարիֆ» էր ուղարկել, որ մեղքն իր վրա վերցնի: Բայց իրավապահները պարզել էին այս կեղծիքն ու մեղադրանք առաջադրել գործարանի տիրոջ տղային, որն էլ իր հերթին դատավորի որդու հետ է եղել:

Այս հանցագործությունից, դեպքի վայրը թողնելուց, ուրիշին իր տեղը «դայաղ» անելուց հետո, քննչականը որոշում է կայացրել, որ օլիգարխի տղան բարեգործ է և նրան ստորագրությամբ ազատ է արձակել:

Եթե հիմա գրեմ, որ այսքան բան աներ մի սովորական բանվորի տղա, նրան մի քանի հոդվածով կդատեին ու կուղարկեին «Կոշ»-ի գաղութ, բայց քանի որ հանցանքների հեղինակը կաթնամթերքի գործարանի որդին է, իր հերթին նաև դատավորի խնամի, նա բարեգործ է դառնում ու ազատ արձակվում: Արդեն պարզ է, որ այս տղան մի րոպե չի նստի ու չի կրի պատիժ:

Սա գալիս է ապացուցելու այն, որ քննչական կոմիտեն, յուր ղեկավար Աղվան Հովսեփյանով դարձել է օլիգարխներին սպասարկող հիմնարկ:

Հիմա հարց պարոն Հովսեփյանին: Ես, պարոն Աղվան, ես ի՞նչ էի արել, որ 3 օր ինձ ապօրինի կերպով փակի տակ էին պահում: Որովհետև հայրս գործարա՞ր չէր, պապս գողակա՞ն չէր: Թե՞ Դուք տեղյակ չէիք․․․

Հիշենք քննչականի նաև վերջին աղմկոտ պատմությունները, երբ քննիչների հովանավորյալներ՝ Ճվճվ Արոյի որդիների մեղքով երկու մարդ մահացավ և միայն հասարակական աղմուկից հետո նրանք ուղարկվեցին իրենց համապատասխան վայր:

Իսկ Ալավերդու սպանությունները կոծկելու համար, արդեն 3-րդ քննիչն է կալանավորվում, նրանցից մեկն էլ քննչականի այն պետն է, որը հավատարմության համար մի քանի ամիս առաջ մեդալ էր ստացել Աղվան Հովսեփյանի կողմից:

Քննչական կոմիտեն դարձել է արդարադատության քաղցկեղը, և րոպե շուտ այս հիմնարկը պետք է մաքրել արատավոր բոլոր երևույթներից ու արատավոր ղեկավարներից»: