«Այս պետությունն ունակ է սպանելու Հաց բերողի նման բարի մարդկանց․ Սա խոսում է մեր պետության որակների մասին»․ Արմեն Հովհաննիսյան (ֆոտո)

«Հաց բերողին սպանեց այս պետությունը»։ Այս խոսքով էր ընթանում երեկ Ազատության հրապարակում «Հանուն Հայաստան պետության» ճակատի անցկացրած հավաքը։ Հավաքի ժամանակ բեմահարթակից ելույթ ունեցող մարդիկ խոսեցին ոչ միայն մեր պետության առաջ ծառացած խնդիրների մասին, այլև խոսեցին Հաց բերողի մասին, ում մահվան տարելիցն էր երեկ։ 

NEWSPRESS.am-ի հետ զրույցում «Հանուն Հայաստան պետության» ճակատի անդամ Արմեն Հովհաննիսյանն ընդգծեց, որ այս ցույցերի շարքը շարունակվելու է, և հավաքներն ու երթերը լինելու են ավելի հաճախ։

«Այսօրվա հավաքը համընկավ Հաց բերողի մահվան տարելիցի հետ ու այս ցույցից հետո տեղի է ունենալու երթ, որի ժամանակ մենք մեր բողոքն ենք արտահայտելու։ Մենք մեր հարգանքն ենք հայտնում ու ցույց տալիս մեր բողոքը պետության դեմ, քանի որ պետությունը սպանեց մի մարդու, ով ոչ ոքի ֆիզիկական ցավ չէր պատճառել, ոչ ոքի չէր սպառնացել, ամբողջ կյանքում ապրել էր խաղաղ, ու դա վկայում է, որ մենք գործ ունենք այնպիսի մի պետության հետ, ով սպանում է նման մարդկանց։ Այդպիսի բարի մարդուն սպանելը խոսում է մեր պետության որակների մասին»։

Արմեն Հովհաննիսյանն ընդգծեց, որ Հաց բերողը դասագրքային օրինակ է, մաքրության ու բարության խորհրդանիշ։ Ճակատի անդամը խոսեց նաև ակցիայի հետագա նպատակների մասին։

«Մենք ցանկանում ենք, որ մեր այս ակցիաներին մասնակցեն հնարավորինս ավելի շատ մարդիկ։ Մեր նպատակն է, որ բոլոր այն մարդիկ, ովքեր դեմ են այս պետությանը, գան ու մասնակցեն մեր հավաքներին։ Մենք մեր նախորդ հավաքին խոսեցինք նաև քաղբանտարկյալների մասին, ու պետք է նշեմ, որ մեր գլխավոր նպատակն է, որ Հայաստանում վերանա քաղբանտարկյալ երևույթը։ Ու պատահական չէ, որ այսօրվա ակցիային շատ են քաղբանտարկյալներին նվիրված պաստառները»։

Հավելենք նաև, որ ակցիայից հետո տեղի ունեցավ երթ։