Մենք մեղք չունենք՝ ՀԷՑ-ն է մեղավոր․ Աջափնյակի թաղապետն արձագանքել է NEWSPRESS-ի հրապարակմանը

Երևանի Աջափնյակ վարչական շրջանի ղեկավար Արտավազդ Սարգսյանը ճանաչում է Լուկաշին թաղամասի տուժած բնակիչներին և կիսում նրանց մտահոգությունը։

Այդ մասին թաղապետն ասաց NEWSPRESS.am-ի հետ զրույցում՝ արձագանքելով «Քաղաքապետի հերթական «ավանտյուրան», «օդից փող բռնելու» տենչն ու Լուկաշին թաղամասի խաբված բնակիչները» գլխագրով հրապարակմանը։

Ավելի վաղ նշել էինք, որ թաղամասի 15 ընտանիք աճուրդային կարգով քաղաքապետարանից գնել են հողեր, որոնց վրա չեն կարողանում շինարարություն իրականացնել, քանի որ տարածքով անցնում են «Ագրոսպասարկում» ընկերությանն սպասարկող բարձր լարման մալուխներ։

Արտավազդ Սարգսյանը ներկայացնելով աճուրդային կարգով հատկացվող հողերի կանոնակարգը՝ նկատում է, որ հիշյալ հողատարածքում ծառայություններ մատուցող բոլոր ընկերություններին հարցում է արվում առ այն, թե որքանո՞վ է անվտանգ կամ պիտանի հողը՝ օտարելու համար։ Ըստ այդմ՝ հողակտորները չեն կարող օտարվել, եթե ծառայություններից առնվազն մեկը դրական եզրակացություն չտա։

Այս կարգի համաձայն, հարցում է արվել նաև ՀԷՑ-ին, քանի որ տարածքով անցել են բարձր լարում ունեցող էլեկտրասյուներ։ Ինչին ՀԷՑ-ն արձագանքել է, թե հոսանք սնուցող մալուխները լարման տակ չեն։ Այսինքն՝ հողը կարելի է օտարել։ Այսօր արդեն ՀԷՑ-ն ամբողջովին հրաժարվում է պատասխանատվություն կրելուց, և հայտարարում է, որ այդ տարածքը իր հաշվեկշռի մեջ չէ։

«Ես չեմ ուզում մեկնաբանել ՀԷՑ-ի եզրակացությունը, բայց, լավ, եկե՛ք տրամաբանենք, եթե մի բանի մեջ հոսանք կա՝ ո՞ւմ տիրույթում է։ Բարձր լարումով հոսանքալարը չի կարող չլինել ՀԷՑ-ի տիրույթում։ Միգուցե ինչ-ինչ պատճառներով իրենց հաշվառումից դուրս են մնացել այդ հենասյուները, բայց ամեն դեպքում դա ՀԷՑ-ի գործառույթում է։ Ես իրավունք չունեմ ո՛չ ապամոնտաժելու, ո՛չ մոտ գնալու, ո՛չ էլ, ինչպես ասում են, մատով ստուգելու՝ հոսա՞նք կա մեջը, թե՞ ոչ»,-ասում է թաղապետն ու հավելում, որ լարում կա, և ինքը չի կարող շինարարության թույլտվություն տրամադրել։

«Ինձ իմ կանոնակարգը թելադրում է՝ ես չեմ կարող քաղաքաշինական փաստաթղթեր տալ, եթե հողակտորի վրայով անցնում են բարձր լարման մալուխներ»,- ասում է վարչական շրջանի ղեկավարը։

Նա նշում է, որ և՛ քաղաքապետարանը, և՛ վարչական շրջանը հնարավորության սահմանում ամեն ինչ արել են՝ խնդրին լուծում տալու համար։ Արտավազդ Սարգսյանը վստահեցնում է՝ ինքը նույնիսկ անձամբ է միջնորդել ՀԷՑ-ին՝ ապամոնտաժել սյուները, կամ այլընտրանք գտնել, սակայն դեռևս պատասխան չի ստացվել։

Հ․Գ․ Տվյալներ կան նաև, որ «Ագրոսպասարկում» ընկերությունը սնուցվում է միանգամից հոսանքի երկու աղբյուրից։ Ասել է թե՝ ընկերությունը կարող է սնուցվել նաև մեկ այլ աղբյուրից և անջատել բնակիչների գնած տարածքով անցնող մալուխների լարումը։ Սակայն ընկերությունը կարծես չի պատրաստվում զիջման գնալ։ Իսկ ՀԷՑ-ն էլ հարցին վերջնականապես լուծում տալու փոխարեն՝ անտրամաբանական ու ոչ խելամիտ հայտարարությամբ է հանդես գալիս, թե ինքը հոսանքի հետ կապ չունի։ Մնում է սպասել ՀԷՑ-ի արձագանքին և հուսալ, որ այս անգամ գոնե ընկերությունն ավելի ողջամիտ պատասխան կտա։