Սերժ Սարգսյանը պաշտոնապես հայտարարում է ստահոդ պետություն ստեղծելու մասին. Նիկոլ Փաշինյան

«Սերժ Սարգսյանը Հրայր Թովմասյանին գործուղում է ՍԴ և նշանակում ՍԴ նախագահ, որպեսզի լինի այս ստահոդ պետության վոչ-դոգը, հայերեն թարգմանությամբ՝ պահապան շունը՝ բառիս, իհարկե, քաղաքական իմաստով»,- հայտարարեց Նիկոլ Փաշինյանն ԱԺ քառօրյա նիստի ժամանակ, որտեղ քննարկվում է ՍԴ նախագահի պաշտոնում Հրայր Թովմասյանին նշանակելու հարցը:

Անդրադառնալով հարցին, թե ինչ կապ ունի Հրայր Թովմասյանն այս ստահոդ պետության հայեցակարգի հետ, Փաշինյանն ասաց․ «Կապն անմիջական է: Հրայր Թովմասյանի ձեռամբ գրված ԱԺ կանոնակարգ-օրենքով՝ խորհրդարանական քննարկումները վեր են ածվում շուտասելուկի»:

Նա նշեց, որ Ռոբերտ Քոչարյանը, երբ դեռ երիտասարդ թոշակառու չէր, Հայաստանում ստեղծեց կազմակերպված-արյունարբու պետություն։ Այդ կազմակերպված-արյունարբու պետության հիմնադիր և ի կատար ածող Սերժ Սարգսյանը երեկվա իր հարցազրույցում հայտարարեց, որ ինքը պատրաստվում է վերցնել ՀՀ վարչապետի պաշտոնը:

«Ես սա համարում եմ հայտարարություն կազմակերպված պետության դարաշրջանի ավարտի մասին, և Սերժ Սարգսյանը պաշտոնապես հայտարարում է ստահոդ պետություն ստեղծելու մասին»,- ասաց նա։