Հաչան շունը կծան չի լինում․ Բաղդասարյանը՝ Փաշինյանին

Ինչո՞ւ ՀՀԿ-ն, հանձին Վահրամ Բաղդասարյանի՝ չի վախենում ընդդիմադիր Նիկոլ Փաշինյանից: Այստեղ, իհարկե, խոսքը կծան շան մասին չէ: Այս ասացվածքի միջոցով Բաղդասարյանը հասկացնում է, որ Նիկոլ Փաշինյանը վտանգավոր չէ, թեև նրա կողմից հնչեցրած սպառնալիքները քիչ է մնում ՀՀ-ի հիմնասյուները քարուքանդ անեն։

Կարճ ասած՝ Բաղդասարյանը հասկացնում է, որ Փաշինյանը «մերոնքական է», թեև մի քիչ հաչան է, բայց անմեղ հաչան։ Ինչպես երևում է, Փաշինյանը մտադիր չէ հերքել նրան և հակառակը համոզելու համար, թեկուզ ձևի համար, մի թեթև կծոց դրոշմել Բաղդասարյանի, ասենք, այտին: Օրվա ընթացքում որևէ կծոցի ձայն կամ հետք չհայտնաբերվեց իրավապահների կողմից, և ուժի մեջ մտավ Բաղդասարյանի հայտարարությունը։

Իսկ հիմա այն մասին, ինչ բխում է այդ հայտարարությունից։

Երևի Բաղդասարյանի համբերությունը հատել էր, լսելով՝ «Փաշինյանն ընդդիմադիր է, ընդդիմադիր է»: Իհարկե, ով պետք է, տեղյակ է, թե նա հայոց քաղաքականության մեջ որտեղ է տեղակայված, այս անգամ պարզապես Բաղդասարյանը հունից դուրս է եկել և քիչ է մնացել կուսակցական գաղտնիքները վեր հանի։

Եվ քանի որ ՀՀԿ բացահայտումները շնից և կծելուց այն կողմ չեն անցել, ապա Փաշինյանը դեռևս մնում է ընդդիմադիր, իսկ Բաղդասարյանը հետայսու լռության երդում է տվել․ նա ասել է ավելին, քան պետք է։

Եվ, իրոք, ի՞նչ է ասում Փաշինյանը, որ նրան ընդդիմադիր է դարձնում: Գրեթե ոչինչ․ բացի սպառնալիքներից և իշխանական ջրաղացին ջուր լցնելուց՝ ոչինչ: Չգիտես ինչու, սակայն, ընդդիմադիրի պիտակն է հետը ման տալիս և ըստ անհրաժեշտության ցուցանում հանրայնորեն։

Օրինակ՝ Փաշինյանը հայտարարել էր, որ Հրայր Թովմասյանին Սերժ Սարգսյանը գործուղել է ՍԴ՝ որպես հավատարիմ շուն: Այս հայտարարության մեջ ոչ մի նոր կամ արտառոց բան չկա. առանց այն էլ հայտնի էր, որ Հրայր Թովմասյանը Սերժ Սարգսյանի մարդն է և ուղարկվել է ՍԴ՝ իշխանությանը հավատարիմ ծառայելու համար։

Մեկ այլ օրինակ՝ Փաշինյանը պահանջում էր Մարտի մեկի դեպքերի համար Ռոբերտ Քոչարյանին ներգրավվել: Սա ևս իշխանություններին ձեռնտու հայտարարություն է, քանի որ զգուշանալով Քոչարյանից՝ ՀՀԿ-ն փորձում է նրան զսպելու մեխանիզմներ ունենալ և «ընդդիմության» ձեռամբ։

Եթե այսքանն էլ Վ․ Բաղդասարյանն ասեր, ստիպված կլիներ հրաժարական տալ, ժամանակին ինքնակազմակերպվել է և հաչան և ոչ կծան շան մասին ասացվածքն է մեջտեղ բերել։

NEWSPRESS.am