Վիգեն Սարգսյանին վարչապետի պաշտոնում առաջադրելը Սերժ Սարգսյանի կողմից փայլուն քաղաքական քայլ կլինի. Ռ. Բաբայան (տեսանյութ)
Հովհ․ Թումանյանի անվան պետական տիկնիկային թատրոնի տնօրեն, բեմադրիչ Ռուբեն Բաբայանի դիտարկմամբ՝ վարչապետի ընտրության հարցը հասարակության պահանջն է՝ ո՞ւմ է ուզում տեսնել հասարակությունը։ Բաբայանը NEWSPRESS.am-ի հետ զրույցում միևնույն ժամանակ նկատում է, որ պարտադիր չէ հասարակությունն իր պահանջն արտահայտի հանրահավաքների տեսքով։ Մյուս կողմից էլ, ըստ Բաբայանի, դա ներքին տրամադրվածություն է։
«Արդյո՞ք այն երկիրը, որին դու սպասում ես, դու ինքդ պետք է հասնես, թե՞ պետք է դա քեզ բերեն-մատուցեն սկուտեղի վրա, թե՞ սպասում ես, որ օրենք կընդունվի, որով փողոցում թքելը կարգելվի․․․»։
Պաշտպանության նախարար Վիգեն Սարգսյանի վարչապետության հետ կապված լուրերին էլ Ռուբեն Բաբայանը տալիս է իր գնահատականը։
Ըստ նրա՝ եթե վարչապետի պաշտոնում առաջարկվի Վիգեն Սարգսյանի թեկնածությունը, դա կլինի փայլուն մտածված քաղաքական քայլ Սերժ Սարգսյանի կողմից։
«Եթե, օրինակ, մեկ տարի առաջ Սերժ Սարգսյանը հայտներ, թե ուզում է, որ Վիգեն Սարգսյանը դառնա վարչապետ, ապա նույն Հանրապետական կուսակցությունում գիտե՞ք ինչ կլիներ․․․ (լռում է)»։
-Իրար «կուտեի՞ն»։
-(Ծիծաղում է)․․․ Դուք ասացիք․․․
Ինչ վերաբերում է ընդդիմության` մի դեպքում «Երկիր Ծիրանի»-ի կողմից ընդվզմանը, իսկ մյուս դեպքում՝ «Ելք»-ի կողմից Սերժ Սարգսյանի վարչապետության դեմ պայքարին, ապա Ռուբեն Բաբայանի դիտարկմամբ՝ ընդդիմությունը ոչ մի արդյունքի չի հասնի։
Նրա խոսքով՝ հասարակության պահանջն ընդդիմությունը դնում է հին՝ արդեն իրենց սպառած ձևերի մեջ՝ ինչ մեկ տարի առաջ, ինչ 20 տարի առաջ։ Ու հասարակության դժգոհությունը դրանից է բխում, թե ոչինչ չի արվում։ Նա իրավիճակին նայում է ռեժիսորի աչքերով։
«Մենք հաճախ ենք քաղաքականության մեջ «թատրոն» բառն օգտագործում՝ վատ իմաստով, բայց դա այդպես չէ։ Իրականում քաղաքականությունը պետք է ճիշտ բեմադրվի և մատուցվի։ 88 թվականի զարթոնքն արդեն գեղեցիկ բեմադրություն էր, որտեղ ժողովուրդը՝ որպես հանդիսատես, իր մասնակցությունն ունեցավ այդ գործողությանը և չմնաց միայն որպես հանդիսատես»։
Ռեժիսորը նկատում է, որ դա այն ժամանակի համար էր լավ, իսկ հիմա նոր ձևեր ու մոտեցումներ են հարկավոր։ Նրա դիտարկմամբ՝ հարկավոր են նաև լոկալ մոտեցումներ։
«Ասում են՝ եկե՛ք իշխանության բուրգը քանդենք, որովհետև իրենք նորից նույն սկզբունքով իրենց բուրգ են կառուցելու ու ներքևներում իրենց մարդկանց նշանակելու»։
Բաբայանի գնահատմամբ՝ այսօր ընդդիմությունը լուրջ ծրագիր չունի իր առաջ դրած ու գալիս է հանպատրաստից։
«Գալիս են տեքստը չսովորած դերասանի նման։ Դեռ ոչ մի բան չես արել, բայց բերում ես հանդիսատես ու հետո նեղանում հանդիսատեսից, որ նա թողնում ու քո ներկայացումից գնում է։ Գնում է, որովհետև վատն է ներկայացումը, այն պատրաստել է պետք։ Այն պատրաստել է պետք՝ լավ իմաստով։ Իշխանությունը հատակին գցած չէ, որ գան ու վերցնեն»։
Ռեժիսորի կարծիքով՝ պետք է շատ զգույշ լինել մարդկանց չհիասթափեցնելու առումով։ Ամեն մի նման քայլ ավելացնում է հիասթափվողների շարքերը։
«Նրանք, ովքեր ուզում են ինչ-որ բաներ անել, պետք է հստակ պատկերացում կազմեն, թե ով է իրենց հանդիսատեսը։ Եթե հին ձևերով են աշխատելու, որակյալ հանդիսատես չեն ունենա։ Չունեցան որակ՝ ավելի վատ կլինի, քանի որ միայն որակն է բերում որակ»։
