«Կուկուռուզնիկի» տեղում շահագործվող բազալտի հանքն ու շենքի բացման բացառիկ լուսանկարները

Երիտասարդական պալատը, որ շատերին հայտնի է «Կուկուռուզնիկ» անվամբ, կառուցումից 25 տարի անց՝ 2005 թվականին, քանդվեց։ Շենքի քանդման որոշումն ընդունեց Երևանի քաղաքապետարանը։ Տեսնելով վիճակագրությունն ու «ավանդույթները»՝ շատերի համար հասկանալի էր, որ տեղում պիտի կառուցվեր այլ բան, սակայն մինչ օրս Երիտասարդական պալատի տեղը դատարկ է։

NEWSPRESS.am Culture-ի հետ զրույցում Կարեն Դեմիրճյանի տուն-թանգարանի տնօրեն Վահագն Մամյանն ընդգծեց, որ Երիտասարդական պալատը, «Զվարթնոց» օդանավակայանն ու մարզահամերգային համալիրն այդ ժամանակաշրջանի խորհրդանիշներն էին։

«Փաստացի, Երիտասարդական պալատը քանդելով՝ ոտնահարեցին նաև այդ ժամանակաշրջանի խորհրդանիշերը։ Այդ կառույցը քաղաքի խորհրդանիշն էր, Աբովյան փողոցի գեղեցկությունը։ Շենքը կառուցեցին այդ ժամանակի ամենաուժեղ ճարտարապետները՝ Արթուր Թարխանյանը, Հրաչիկ Պողոսյանն ու Սպարտակ Խաչիկյանը։ Կառուցեցին 1980 թվականին և քանդեցին 25 տարի անց»։

Վահագն Մամյանն ընդգծեց, որ Երիտասարդական պալատն այն վայրն էր, որը միավորում էր այդ ժամանակաշրջանի երիտասարդներին։

«Պալատում կար հարսանյաց սրահ, ամուսնությունների գրանցման վայր, սրճարան, լողավազաններ, հյուրանոցներ ու ամեն ինչ։ Փաստացի քաղաքի ամբողջ երիտասարդությունը կենտրոնացած էր այդ վայրում։ Բացի այդ, դա ճարտարապետական կառույց էր, իսկ ներկայիս ճարտարապետական կառույցները նման են ակվարիումի։ Միայն ապակի է ու ուրիշ ոչինչ։ Հիմա վտանգի տակ է նաև «Զվարթնոց» օդանավակայանը, որը մեր աչքի առաջ քանդվում է, իսկ փոխարենը նրա կողքին վեր խոյացավ մի ակվարիում։ Աբսուրդային է նաև այն, որ պալատը քանդեցին ու տեղում ոչինչ չկառուցեցին, այլ տարիներ անց տեղում բազալտի հանք սկսեցին շահագործել։ Միթե՞ կարելի է Երևանի կենտրոնում շահագործել բազալտի հանք։ Կամ միթե՞ մենք բազալտ կամ քար չունենք։ Միայն ապագան ցույց կտա, թե Երիտասարդական պալատի տեղում ինչ կլինի»։

Հավելենք նաև, որ ամիսներ առաջ մամուլում ու համացանցում բուռն քննարկումների ու քննադատությունների արժանացավ «Խաչ Երևանի համար» նախագիծը, որը նախատեսված էր կառուցել Երիտասարդական պալատի՝ «Կուկուռուզնիկի» տեղում։

Երիտասարդական պալատի բացման արարողության բացառիկ լուսանկարները NEWSPRESS.am Culture-ին տրամադրել է Կարեն Դեմիրճյանի թանգարանի տնօրինությունը։ Լուսանկարները պահվում են թանգարանի արխիվային ֆոնդերում։