ՀՅԴ-ական «Մեղեդու» Միքայելը 22 միլիոն դոլարի ներդրում է խոստացել. 20.000 քմ տարածքը Տարոն Մարգարյանը վաճառել է ընդամենը 160.000 դոլարով (ֆոտո)

Կառավարությունը երեկ բավականին առատաձեռն է գտնվել. բացի այն, որ որոշում ընդունեց, որով պաշտոնաթող նախագահ Սերժ Սարգսյանին բնակարան կհատկացնի, նաև շռայլ գտնվեց ՀՅԴ-ական Միքայել Մանուկյանի նկատմամբ, ով այժմ զբաղեցնում է Անտառային պետական կոմիտեի նախագահի պաշտոնը:

Բանն այն է, «Խարիսխ» համահայկական, մշակութային բարեգործական հիմնադրամին Երևանի քաղաքապետարանն ուղղակի վաճառքի տեսքով օտարեց Սեբաստիա թաղամասում՝ Մոնթե Մելքոնյան փողոցում գտնվող 1,1 հեկտար տարածքը։ Տարածքը քաղաքապետարանի կողմից հիմնադրամին կվաճառվի շուրջ 160.000 դոլարով։
Որոշման հիմնավորման մեջ ասվում է. Կենտրոնի ընդհանուր մակերեսը կկազմի՝ շուրջ 20000 քմ, ծրագրի իրականացման ժամկետը՝ շուրջ 3 տարի, ծրագրի արժեքը՝ շուրջ 22 մլն ԱՄՆ դոլարին համարժեք դրամ:

Միայն որոշ աղբյուրներ պնդում են, որ «Խարիսխ» համահայկական, մշակութային բարեգործական հիմնադրամի հիմնադիրը Միքայել Մանուկյանն է (հանրության մեջ առավել հայտնի է «Մեղեդու Միքայել» անվամբ, քանի որ Օպերայի տարածքում գտնվող «Մեղեդի» սրճարանը պատկանում է Միքայել Մանուկյանին-խմբ.), իսկ համենայնդեպս համացանցում ոչ մի կոնտակտային տվյալ չկա այս հիմնադրամի մասին:

«Խարիսխ» համահայկական, մշակութային բարեգործական հիմնադրամը նախատեսում է իրականացնել ներդրումային ծրագիր, որի նպատակն է ստեղծել ժամանակակից, միջազգային չափանիշներին համապատասխան, Հանրապետությունում նմանատիպը չունեցող բազմաֆունկցիոնալ կենտրոն:

Նշված կենտրոնն իր մեջ կներառի գրասենյակային տարածքներ, կոնֆերանս դահլիճներ, ցուցասրահներ, գրադարաններ, թանգարան, մարզադահլիճ, լողավազան և սրճարան:

Նոր կենտրոնը կնպաստի Հանրապետությունում երիտասարդական ազգային մշակութային կյանքի աշխուժացմանը, ավանդույթների պահպանմանն ու փոխանցմանը հաջորդ սերունդներին, ինչպես նաև առողջ ապրելակերպի ձևավորմանը:

Փաստորեն, դեռևս ոչ մի քայլ չարած այս բարեգործական հիմնադրամի մասին տեղյակ են միայն իշխանական վերին թևում, և զարմանալի է՝ այդ դեպքում այս բարեգործական հիմնադրամն ո՞ւմ համար է բարեգործություններ արել: Հավանաբար, հենց նրանց, ովքեր «Խարիսխ»-ին կադաստրային արժեքով տարածք են վաճառում և «թեթև տանում», որ պետական պաշտոնյան ձեռնարկատիրական գործունեություն է ծավալում:

Լուսանկարում՝ «Խարիսխ» համահայկական, մշակութային բարեգործական հիմնադրամի օտարվող՝ Երևանի Մոնթե Մելքոնյանի փողոցին հարակից 1,1 ՀԱ հողամասի սխեման է: