Քաղաքապետի «դուխն ու թափը» չհերիքեցին մերժել Գայանեին

Այս օրերին շատ է քննարկվում Երևանի Չեխովի անվան դպրոցի տնօրենի տեղակալների հարցը․ ո՛չ ավել, ո՛չ պակաս՝ միանգամից 10 տեղակալ՝ մեկ տնօրենի համար:

Ընդհանրապես Չեխովի տնօրեն Գայանե Սարուխանյանի «բեսպրեդել»-ը նորություն չէ։ Չենք քննարկում այն ճանապարհը, որով անցել է Գայանե Սարուխանյանը։ Չենք խոսում նաև այն մասին, թե ինչպես վանաձորցի Գայանե Սարուխանյանը՝ Վանաձորում հայտնի հարկայինի Արմենի քույրը (Արմեն Սարուխանյան- հեղ․) եկավ Երևան, դարձավ ԱԺ «Շամիրամ» խմբակցության անդամ, պատգամավոր ու ստանձնեց Չեխովի դպրոցի տնօրենի պաշտոնը։

Ինչպես և ինչուն՝ իր խղճի հետ․․․ Այստեղ խնդիրն այն է, որ այդ խիղճը նա մի կողմ է դրել ու զբաղված է ո՛չ թե դպրոցի վարկանիշը բարձրացնելով, ինչպես շատերը միամտաբար կարծում են, այլ իր «ես»-ը փառավորելով՝ իմն է, ես եմ, ես լավն եմ, ուժեղ եմ, ես արժանի եմ․․․

Բայց այստեղ հարցը ո՛չ նրա ուժն է, ո՛չ էլ ավելի արժանի լինելը, պարզապես «լավ է սնվում» և «մարսողության» հետ էլ խնդիրներ չունի․ զոռբայությամբ իրենն է առաջ տանում՝ մարսում է, ծնող է ծեծում՝ մարսում է, ուսուցիչ է վռնդում՝ մարսում է, դրամահավաքություն է անում (մամուլում շրջանառվող լուրերի և ծնողների բաց նամակների համաձայն-հեղ․)՝ մարսում է․․․

Հիշեցնենք, թե ինչպես էր նա ծնողին քաշքշել՝ վերջինիցս իրեն վարկաբեկող ձայնագրությունն ստանալու համար։ Ծնողը բողոքեց, բայց քանի որ Սարուխանյանն արդեն ձայնագրությունն «առգրավել» էր, ուստի ապացուցելու բան չեղավ։ Մի բան էլ ծնողին մերկապարուհի անվանեցին (թեև դա աշխատանք է և ոչ մի անօրինական բան չկա, եթե իհարկե, իսկապես մերկապարուհի էր), ու դատարանը նրան ձեռնունայն ճանապարհեց։

Ուշագրավ էր նաև ռուսերենի ուսուցչուհու հետ կապված միջադեպը։ Տնօրենն ուսուցչուհուն դպրոցում գործի է ընդունել ու 3 ամիս անց ազատել, քանի որ ուսուցչուհին ինչ-որ հարցերում ըմբոստացել է։ Քաղաքապետարանն իրեն ուղղված հարցմանը, թե ինչ հիմքով է ազատվել ուսուցչուհին, պատասխանել է, թե նա համապատասխան մասնագիտություն չուներ։ Այստեղ հարց է առաջանում՝ եթե չուներ կրթություն, ապա ինչո՞ւ է տիկին Սարուխանյանը նրան աշխատանքի ընդունել՝ կաշառքի՞ դիմաց, ինչպես լուրեր են շրջանառվում, թե՞ ինչ-որ մեկին լավություն էր անում՝ ոչ համապատասխան կրթություն ունեցողին աշխատանքի ընդունելով։

Իսկ եթե նա ուսուցչուհուն ընդունել է առանց փաստաթղթերը ստուգելու՝ դա ավելի վատ է և նշանակում է, որ տնօրենը թերացել է իր մասնագիտական աշխատանքում, ու ազատել էր պետք այս դեպքում հենց նրան։ Բայց փաստն այն է, որ աշխատանքից ազատվեց ո՛չ թե տնօրենը, այլ ուսուցչուհին․․․

Քաղաքապետ Մարգարյանի «դուխն ու թափը» հավանաբար չհերիքեցին Սարուխանյանի մազին կչպել։ Ինչպես եղավ նաև այս անգամ՝ տեղակալի նշանակման հարցում։

Նախորդ տարի քաղաքապետը Սարուխանյանին այս հարցում մերժել էր, բայց այս տարի ընկրկեց, կոտրվեց ու ծնկի իջավ։ Ասում են՝ Սարուխանյանն իրենից գոհ քրթմնջացել է, թե «քաղաքապետին ծնկի բերեց»։

Ու այս պարագայում տրամաբանական էր, որ քաղաքապետանից հարցի շուրջ մեկնաբանություն չէին ցանկանա տալ։ NEWSPRESS.am-ի հարցմանն ի պատասխան, քաղաքապետարանից նախ ասացին, որ խնդիրը չեն ուսումնասիրել, կուսումնասիրեն ու կպատասխանեն, թե ինչ հիմքերով է քաղաքապետարանը տնօրեին թույլ տվել 10 տեղակալ պահել, իսկ հետո այդպես էլ, ո՛չ այդ օրը, ո՛չ էլ դրա հաջորդ օրը, մեր զանգերին չպատասխանեցին․ ասելիք չկար, ի՞նչ ասեին, երբ քաղաքապետը՝ ինքը, ամբողջ քաղաքի հարցերը կարգավորելու համար ունի ընդամենը 4 տեղակալ, երբ նախարարություններում բավականին թվով տեղակալներ ու նախարարների օգնականներ կրճատվեցին, իսկ Չեխովի դպրոցի տնօրենին՝ հենց քաղաքապետի թողտվությամբ, 10 տեղակալ է բաժին ընկել՝ իր նազիր-վեզիրներով։ Ու այստեղ չի քննարկվում, թե ո՞ւմ հաշվին են պահելու այդ տեղակալներին, ի՞նչ գումարով, և ի վերջո՝ լա՛վ, այդքան շատ տեղակալներ ունեցող տնօրենի բանուգործն ի՞նչ է լինելու՝ պարզապես դպրոց գալ-գնա՞լն ու իրեն այդ ամենի ղեկավար զգա՞լը․․․

Պատրաստ ենք հրապարակել քաղաքապետանի արդարացումը, եթե Սարուխանյան Գայանեն արդարանալու տեղ է թողել․․․

Արմինե Մկրտումյան