Ապրիլի 1-ն աշխարհում՝ Ծիծաղի օր

Ապրիլի 1-ին նշվում է Ծիծաղի օրը: Այս օրը ամարվում է միջազգային, քանի որ հենց ապրիլի 1-ին ուրախանալու, կատակելու ու միմյանց խաբելու սովորույթը տարածված է աշխարհի բազմաթիվ երկրներում: Ապրիլի 1-ն անվանում են և՛ Ծիծաղի, և՛ Հիմարների օր։

Թե կոնկրետ երբ է տոնը առաջացել՝ մինչ օրս վիճում են: 

Ենթադրություն կա, որ ապրիլի 1-ին հին աշխարհում կատակել են միայն իռլանդացիները, այն էլ Նոր տարվա պատվին՝ համաձայն իռլանդական ասքերի:

Վարկածներից մեկի համաձայն՝ ի սկզբանե ապրիլի 1-ը տոնվել է Հնդկաստանում ու Հին Հռոմում՝ որպես գարնանային գիշերահավասարի օր: Կատակելով՝ մարդիկ ձգտել են հաղթահաել բնության գարնանային կամակորությունները:

Մեկ այլ վարկածի համաձայն՝ Ծիծաղի օրը կապված է Գրիգորյան օրացույցի հետ, որը Գրիգորիուս 13-րդը սահմանել էր 1582թ.:

Միջին դարերում Նոր տարին տոնվել է մարտի վերջից ու ավարտվել հենց ապրիլի 1-ին:

Անգլիայում ընդունված է կատակել ու միմյանց խաբել միայն օրվա առաջին կեսին: Համարվում է, որ կեսօրից հետո կատակելն անհաջողություն կբերի:

Շոտլանդիայում այս օրը անվանում են Կկվի օր և տոնում են երկու օր:

Գերմանիայում ապրիլի 1-ը համարվում է անհաջող օր: Գերմանացիները կարծում են, որ այս օրը ծնվածները անհաջողակներ են: Գյուղերում ապրիլի 1-ին չեն աշխատում, նոր գործեր չեն նախաձեռնում:

Պորտուգալիայում Ծիծաղի օրը միմյանց վրա ալյուր են նետում:

Ֆրանսիայում բոլոր նրանց, ովքեր հավատում են կատակներին, անվանում են «Ապրիլմեկյան ձուկ» (Poisson d’April)՝ նկատի ունենալով, որ ապրիլյան ձկանը շատ հեշտ է որսալ: Տարածված կատակ է մարդկանց մեջքին թղթե ձուկ փակցնելը:

Հնդկաստանում տոնն անվանում են Holi Festival և նշում մարտի 31-ին: Այդ օրը կատակում են, միմյանց ներկում, թռչում խարույկի վրայով ու տոնում գարնան գալուստը:

Հայաստանում ապրիլմեկյան ծիծաղի տոնը հաճախ շփոթում ենք այնպիսի անընդունելի երևույթի հետ, ինչպիսին սուտ խոսելն է:

Ոմանց մոտ այն կարծրատիպն է արմատավորված, որ իբր այդ օրը որքան շատ ստեր հորինես, այնքան լավ: Եթե նույիսկ անհրաժեշտություն են համարում ստելը, ապա այն պետք է լինի շատ նուրբ, միայն ծիծաղ առաջացնելող: