Հակառակորդն այլևս ի վիճակի չէ նման ռազմական գործողությունների գնալ. Մովսես Հակոբյան

Հայրենիքը Հանրապետական կուսակցությանը չէ, հայրենիքը հայ ժողովրդինն է: Այդ մասին այսօր «Եռաբլուր» զինվորական պանթեոնում լրագրողների հետ զրույցում նշեց ՀՀ Զինված ուժերի գլխավոր շտաբի պետ, գեներալ-գնդապետ Մովսես Հակոբյանը՝ անդրադառնալով Լելե Թեփեի բարձունքը հետ բերելու անհրաժեշտությանը և մասնավորապես հանրապետականների այն տեսակետին, թե Լելե Թեփեն ռազմավարական նշանակություն չունեցող բարձունք Է: 

Հարցին, թե ե՞րբ է վերադարձվելու այն, Մովսես Հակոբյանը պատասխանեց. «Երբ դրա անհրաժեշտություն լինի»:

Ըստ ԶՈւ ԳՇ պետի՝ Լելե Թեփեն ռազմավարական նշանակություն չունի: 

Նա նշեց, որ ապրիլյան պատերազմը բանակի համար մեծ դաս և մեծ փորձառություն էր: «Այս երկու տարիների ընթացքում բավականին մեծ աշխատանք է կատարվել, այն խնդիները, որ առաջ էին եկել ապրիլյան պատերազմի ժամանակ, կարող եմ փաստել, որ դրանց բոլորի վերաբերյալ համապատասխան միջոցառումներ են ձեռնարկված: Հակառակորդն այլևս այդպիսի՝ որպես ռազմական գործողություն, ի վիճակի չի իրականացնել, բայց դա չի նշանակում, որ դա բավարար է: Բանակը, պատերազմն այնպիսի երևույթ է, որ անընդհատ նոր մեթոդներ է փնտրում հակառակորդի հանդեպ գերակայություն ձեռք բերելու համար, և մենք աշխատանքներն իրականացնում ենք այդ ուղղությամբ»,- ասաց Հակոբյանը: