«Լույս՝ թունելի վերջում»․ «Մովսես մարգարե» Փաշինյանը ժողովրդին տանում է դեպի լույսը

«Քաղաքացիական պայմանագիր» կուսակցության անդամ Նիկոլ Փաշինյանի նախաձեռնած «Իմ քայլը» երթին նոր անդամներ են միացել։ Այդ մասին հայտնեց Փաշինյանը՝ ֆեյսբուքյան ուղիղ եթերով։

Արշավի մասնակիցներն անցել են Սպիտակի թունելով։ Նիկոլ Փաշինյանը, տեղադրելով թունելի լուսանկարը ֆեյսբուքյան իր էջում՝ գրառել է «Լույս՝ թունելի վերջում»։

Առայժմ ստույգ դժվար է ասել, թե կոնկրետ ինչի կհանգեցնի Փաշինյանի սկսած այս զբոսանքը և արդյոք լույս կվառի՞ կամ կոնկրետ ո՞ւմ համար լույս կվառի թունելի վերջում։ Ակնհայտ է, որ մարդիկ այնքան էլ մեծ հույսեր չեն կապում այս արշավի հետ, հատկապես հաշվի առնելով այն, որ «Ելք» խմբակցությունն էլ ժամանակին հանդես էր գալիս ամպագոռգոռ հայտարարությամբ, թե՝ ելքը մեկն է և դա «Ելք»-ն է։

Պարզվեց, որ այսօր դաշինքը ո՛չ միայն ժողովրդի, այլև իր ելքը չի տեսնում։ Այնպես որ՝ դեռ վաղ է խոսել «թունելի վերջում լույս» տեսնել-չտեսնելու մասին։

Առայժմ ֆեյսբուքյան օգտատերերն ակտիվ մեկնաբանում են հենց բուն երթը, որին հետևում են ֆեյսբուքյան ուղիղ կապով։

Հավանաբար, երթը մարդկանց այնքան էլ հույս չի ներշնչում, քանի որ մեկնաբանությունների մեծ մասն իր մեջ հեգնանք է պարունակում։

Օգտատերերից մեկը խնդրում է չխաբել մարդկանց։

«Խնդրում եմ՝ հանկարծ վերջնականապես չհիասթափեցնեք մեր ազատաբաղձ, բազմաչարչար ժողովրդին. նա արժանի չէ դրան.. Առաջ դեպի մեր մահամերձ հայրենիքի վերահառնումը»,- գրել է նա։

Մեկ այլ օգտատերեր էլ Փաշինյանին նույնացրել է Մովսես Մարգարեի հետ, ով հանել է Իսրայելի ցեղերին Եգիպտոսից, որտեղ ժողովուրդը ստրկության մեջ էին (Աստվածաշունչ-հեղ․)։ «Մովսես Մարգարեն ապի․․․»,- գրել է օգտատերը։

Օգտատերերից մեկն էլ նկատել է․ «Յանըմ հելե քայլելով ման գալով ի՞նչ պետք է փոխեք»։

Եվս մեկ մեկնաբանությամբ էլ խմբի անդամներին հորդորում են․ «Տղերք, էսքան տանջվելու փոխարեն Սերժին ու ախպորը գյուլեք, պրծեք»։