«Պոնչո» գործարարը «շանտղաբար» թալանում է ու ախ չի քաշում

«ՍԱՍ» սուպերմարկետում թալանում են ժողովրդին: Այս մասին բազմիցս գրվել է, բարձրաձայնվել է, սակայն այդպես էլ ոչ ոք ոչինչ չի անում:

Օրերս էլ «ՍԱՍ» սուպերմարկետից հերթական անգամ գնումների ժամանակ վճարեցի և հետո միայն նկատեցի, որ հաշվարկում ինձ ավելի քան 6000 դրամ խաբել են։ Մտովի հիշում եմ նախորդ գնումներս ու հասկանում, որ նրանք ամեն անգամ, մի քանի հազար դրամով խաբում են: Սա թալան է: Օրը ցերեկով: Թալան՝ Օրենսդիրը ներկայացնող «ՍԱՍ»-ի Արտակի կողմից։

Թալանում է տարբեր տարբերակներով։ Նախ ապրանքների պիտակավորված գները շատ հաճախ չեն համապատասխանում համակարգչում ֆիքսված գներին։ Օրինակ՝ 1280 դրամանոց քաղցրավենիքը համակարգչով անցկացնելիս հրաշքով կարող է դառնալ, ասենք, 2410 դրամ: Այսպես շատ ապրանքներ: Բայց մեր օրերի «Օստապ Իբրահիմովիչ Բենդեր» Արտակի խարդախություններն այսքանով չեն սահմանափակվում։

Դրամարկղում շատ հաճախ վճարում ես այն ապրանքների համար, որոնք չես գնել։ Օրինակ՝ պատահել է, երբ «կասիրշան», չգիտես ինչու, շահագրգռված ու ջանափութորեն, գնումներին ավելացնում է դրամարկղում տեղադրված մանկական կոնֆետներ կամ նմանատիպ այլ ապրանքներ, որոնք հայտնաբերում ես միայն տանը։

Թալանի մեկ այլ տարբերակ էլ կա, որը, ինչպես վարչապետը կասեր, իսկական «շանտղություն» է: Ժամկետանց ապրանքների վրա, մեր «պոնչո» գործարար ու, չմոռանանք նաև, օրինաստեղծ, Սարգսյանը գրել է տալիս նոր ժամկետ՝ «սռոկ-գոդնստի», դնում սովորական ապրանքների հետ և վաճառում: Դա է պատճառը, որ «կոմպոտները» թթված են, բլինչիկները՝ նամշած, իսկ թթվասերի և այլնի մասին էլ չեմ ասում:

Առաջին հայացքից կարող է թվալ, որ սուպերմարկետների թալանչիությունը մանր ժուլիկություն է, բայց ոչ: Միայն հաշվեք, թե օրվա ընթացքում քանի մարդու են 100-ից մի քանի հազար դրամ խաբում: Օրվա վերջում՝ միլիոններ, տարվա վերջում՝ միլիոնավոր դոլարներ: «ՍԱՍ»-ի Արտակը հարստանում է ո՛չ թե մաքուր բիզնեսով, այլ իր իսկ հաճախորդներին խաբելու և մոլորոցնելու միջոցով:

Հարց է առաջանում. Պարո՛ն Արտակ, հերիք չէ՞ լկտիաբար թալանեք ժողովրդին:

Հ․Գ. Տողերը գրելիս ակամա մտքիս եկավ այն թշվառ ու սոված քաղաքացին, որը մեկ պեչենի էր գողացել խանութից: Հիշում եք, չէ՞, ինչպես ձերբակալեցին սոված մարդուն: Երևանի կենտրոնում տեղի ունեցած ձերբակալությունից ակամա մեզ թվում էր, թե Ուսամա Բեն Լադենին են ձերբակալում, բայց պեչենի էր գողացել: Իսկ «ՍԱՍ»-ի Արտակը որ բոլորին խաբում ու միլիոններ է գողանում, ոչ մեկ չի ձերբակալում նրան: Ինչպե՞ս ձերբակալեն մեր օրերի Բենդերին․ չէ՞ որ նա իշխանության տղան է:

Արիանա Հովսեփյան 

NEWSPRESS.am-ի հիմնադիր-տնօրեն