Ինչպե՞ս են սև բլոճն ու սպիտակ որդը հայտնվել Սամվել Ալեքսանյանին պատկանող ընկերության ալյուրի մեջ

Օրերս Երեւան քաղաքի բնակչուհի Քրիստինե Տեր-Մաթեւոսյանը «Երեւան սիթի» սուպերմարկետների ցանցի մասնաճյուղերից մեկից գնելով «Բաղրամյան ալյուր» ապրանքանիշի երկու պարկ, դրանց մեջ հայտնաբերել էր միջատներ՝ սեւ բլոճ եւ սպիտակ որդ: Քրիստինե Տեր-Մաթեւոսյանը դիմել է ՀՀ Գյուղատնտեսության նախարարության Սննդամթերքի անվտանգության պետական ծառայություն, հանձնել նշված պարկի մնացորդը ու եւս մեկ չբացված պարկ, որոնք այս օրերին ենթարկվում են մանրէաբանական փորձաքննության:

newspress.am-ի թղթակիցի հետ հեռախոսազրույցում այս ամենը հաստատեց նաև ՀՀ Գյուղատնտեսության նախարարության Սննդամթերքի անվտանգության պետական ծառայության պետի մամլո քարտուղար Նվարդ Առաքելյանը: Վերջինիս խոսքով` ՍԱՊԾ պետի հրամանի համաձայն՝ «Ալեքս Գրիգ» ՍՊԸ-ին պատկանող «Երևան Սիթի» սուպերմարկետների Գայի պողոտա 16, Ռուբինյանց 15/5, Կոմիտաս 60/2 հասցեներում գործող մասնաճյուղերում նոյեմբերի 11-12-ին իրականացվել է դիտարկում եւ հսկիչ գնում «Բաղրամյանի ալյուր» ապրանքանիշի նկատմամբ:

Նա հավելեց, որ Ռուբինյանց 15/5 հասցեում գործող «Ալեքս Գրիգ» ՍՊԸ-ին պատկանող «Երեւան Սիթի» սուպերմարկետում հայտնաբերվել են ոչ ընթեռնելի պիտանիության ժամկետով 5 փաթեթ ալյուր, որոնք անմիջապես հանվել են իրացումից, մակնշման հետ կապված այլ խախտումներ չեն հայտնաբերվել: Նվարդ Առաքելյանը նկատեց, որ գնորդի կողմից ներկայացված նմուշները ուղարկվել են լաբորատոր փորձաքննության: Լաբորատոր փորձաքննության արդյունքները հայտնի կլինեն վաղը՝  նոյեմբերի 17-ին:

«Վաղը պարզ կդառնա՝ սեւ բլոճն ու սպիտակ որդը Սամվել Ալեքսանյանին պատկանող ընկերության ալյուրի մեջ են հայտնվել լրիվ պատահաբա՞ր, թե՞ իրականում գնորդներին է ներկայացվել փչացած ալյուր»,- ասաց Նվարդ Առաքելյանը: