Աբովյանցի ծննդկանի երեխան ծնվել է թթվածնի քաղցով․ նրան Երևան են բերել արդեն ծանր վիճակով

Ապրիլի 1-ին Աբովյանի ծննդատնից Երևան՝ «Սուրբ Աստվածամայր» բժշկական կենտրոն են տեղափոխել 29-ամյա ծննդկանին՝ իր ծանր վիճակում գտնվող փոքրիկի հետ։

Երեխան «Սուրբ Աստվածամայր» բժշկական կենտրոնի վերակենդանացման բաժանմունքում մահացել է։ Հարազատները մեղադրում են վերակենդանացման բաժանմունքի վարիչ Աննա Չոբանյանին, ով, նրանց խոսքով, թերացել է իր մասնագիտական պարտականությունների մեջ։

«Ո՛չ, դա այդպես չէ»,- NEWSPRESS.am-ի հետ զրույցում ասաց Աննա Չոբանյանը։
Նա ասաց, որ Աբովյանում կինը ծանր ծննդաբերություն է ունեցել․ երեխան ծնվել է կեսարյան հատումով:

«Կինն արյունահոսություն է ունեցել, ընդ որում՝ երկար ժամանակ է արյունահոսել, կեսարյան են կատարել, երեխան ցածր բալով է ծնվել՝ թթվածնային քաղցով, քանի որ շերտազատում է եղել։ Անմիջապես վերակենդանացման միջոցառումներ են կատարվել և տեղափոխել են մեզ մոտ»։ «Սուրբ Աստվածամայր» ԲԿ-ում արդեն միացրել են հատուկ սարք, իսկ գիշերը երեխայի վիճակը ծանրացել է, և նրան միացրել են արհեստական շնչառություն։

«Երեխայի մոտ առաջացավ վիճակ, երբ օդը դուրս է գալիս թոքից դեպի լեղախոռոչ և անցել է լրիվ արհեստական շնչառության: Մեկ օր է ապրել»,- բացատրեց բժշկուհին, ում խոսքով, երեխայի կյանքն այդ պահին կախված չի եղել բժշկի աշխատանքից, այլ վիճակի ծանրությունից։

«Այն, ինչ կապված էր մեր մասնագիտական աշխատանքի հետ, արել ենք, երեխային մեզ մոտ բերել են ծանր վիճակով»,- նշեց Աննա Չոբանյանը։

Նկատենք նաև, որ դեպքի առթիվ հարուցվել է քրեական գործ։