«Մեղայ Աստծու». Կճոյանը «Բենթլիո՞վ» կգա երթի, թե՞ նաև քայլում է

Մի անեկդոտ է պտտվում բերնեբերան: Անունը չնշեմ՝ Աստծու առաջ մեղք չգործելու համար, բայց անեկդոտը պատմեմ:

Եկեղեցական ժողով է լինում, առաջնորդն Աստծո պատվիրաններն է ընթերցում: Հասնելով «մի՛ շնացիր»-ին, կանգ է առնում: Ժողովի մասնակից բարձրաստիճան հոգևորականն ասում է. «Այո, հիշեցի, թե որտեղ եմ մոռացել «Բենթլիս»:

Բայց սա հենց այնպես, նախերգանքի համար: Հիշեցի անեկդոտը, որովհետև լուր եմ կարդում:

«Հայ առաքելական եկեղեցու Արարատյան Հայրապետական Թեմի Առաջնորդական փոխանորդ Տեր Նավասարդ արքեպիսկոպոս Կճոյանը որոշել է երթ իրականացնել: Նավասար Կճոյանը և եկեղեցու հետևորդները Սուրբ երրորդություն եկեղեցուց երթով կգնան Եռաբլուր պանթեոն»:

Լուրը կարդալուց անմիջապես հետո, մի բան եկավ մտքիս. «Մեղայ Աստծու»: Թե երբվանից Կճոյանը դարձավ երթ անող խոնարհ քրիստոնյա, մենք էլ չիմացանք այդ մասին: Ի դեպ, Արքեպիսկոպոս, ասել կուզի՝ արքայական եպիսկոպոս: Միայն պատկերացնելուց, ծիծաղն ու դառն իրականությունը խառնվում են իրար: Ինչպես նախագահը կասեր. «Յա՞, իրոք»:

Գայլերը հովիվ են կարգվել հոտի առաջ, ու մեղավորը ոչ թե խժռող գիշատիչ գայլն է, այլ հոտը, որը ենթարկվում է սքեմի տակ թաքնված «գողական» քահանային:

Տարիներ առաջ հենց այս մարդն ու երկրի նախկին վարչապետը 10 մլն դոլար հափշտակեցին գործարար Փայլակ Հայրապետյանից՝ նրան դարձնելով ունեզուրկ: Իհարկե, Կճոյանն այդպես էլ բանտի նառերի վրա չքնեց, որովհետև մի 3-րդ մարդ «վիզ վերցրեց» ու գնաց բանտ:

Մենք շարունակաբար քննադատում ենք երկրի քաղաքական ղեկավարությանը՝ մոռանալով հաճախ հիշեցնել կճոյանների գոյության ու երկրում տիրող անբարո մթնոլորտի համար նրանց անմիջական մեղավորության մասին: Հենց կճոյաններն են, որ սրբի անվան տակ սատանայական մեղքեր գործելով՝ առաջ են տանում իրենց անձնական գործերը, իսկ անունը մնում է «արքայական եպիսկոպոս» ու պաշտոնը՝ թեմի առաջնորդ:

Զավեշտ է: Ողբերգություն է, երբ Կճոյանի նման մեղսագործն է հոգևոր առաջնորդն ու երթ կազմակերպողը:

Իսկ այսօրվա երթի ժամանակ, եթե նա տեսնի լրագրողներին, նորից կմրթմրթա՞. «Սրանք ոնց որ միլիցա լինեն, ուր գնում ես, կպռշկված գալիս են»:

Դա է մեր արքայական եպիսկոպոսը, որ միայն իրեն է հայտնի, թե ինչու ապրիլի երկուսին Պանթեոն չգնաց, իսկ այսօր որոշել է մեծ երթով ու շուքով գնալ։

Արիանա Հովսեփյան 

NEWSPRESS.am-ի հիմնադիր-տնօրեն