«Ժողովուրդ». Ապրիլի 9-ին գործադիրը հրաժարական կտա. Կառավարության անդամները աշխատանք են փնտրում
«Ժողովուրդ» թերթը գրում է.
«Երեկ Կարեն Կարապետյանի գլխավորած կառավարության վերջին նիստն էր. երկուշաբթի օրը՝ ապրիլի 9-ին, երբ նորընտիր նախագահ Արմեն Սարգսյանը երդմնակալությունից հետո ստանձնի իր պարտականությունները, գործադիրը հրաժարական կտա:
Եվ չնայած երեկ Կարապետյանը կառավարության անդամներին «աչքալուսանք» տվեց, թե շատ չուրախանան՝ միասին աշխատելու են, սակայն նկատենք, որ երեկ շատերի մոտ անորոշության և ճամպրուկային տրամադրություն էր, խոսքը բոլոր օղակների ներկայացուցիչների, այդ թվում՝ կառավարության աշխատակազմի մի շարք աշխատակիցների մասին էր:
Թերթի տեղեկություններով` նրանցից շատերն արդեն տեսել են իրենց գլխի ճարն ու նոր աշխատանք գտել, ոմանք էլ մտմտում են՝ փնտրելով նոր աշխատանք: Ըստ ամենայնի, հենց Կարեն Կարապետյանն է նշանակվելու առաջին փոխվարչապետ և մնալու է այդ շենքում, բնականաբար, չի ունենա այնպիսի աշխատակազմ, ինչպիսին այժմ է:
Բացի այդ էլ, վարչապետ նշանակվելով` Սերժ Սարգսյանն իր կադրերին «կբերի» իր հետ: Պատահական չէ, որ երեկ նա միանգամից իր երեք խորհրդականներին էր աշխատանքից ազատել՝ իհարկե, հետագայում նրանց արդեն իր աշխատակազմում ներառելու հեռանկարով»:
Մանրամասները՝ թերթի այսօրվա համարում
