«Շատացել են տղաները, ովքեր ցանկանում են ունենալ գեղեցիկ քիթ»․ պարզաբանում է վիրաբույժը

Անզեն աչքով էլ երևում է, որ վերջին տարիներին Հայաստանում շատերն են օգտվում պլաստիկ վիրաբույժի ծառայություններից։ Եթե տարիներ առաջ այդ մշակույթը դեռ չէր տարածվել Հայաստանում, կամ էլ անհասանելի էր շատերի համար, ապա վերջին տարիներին վերոնշյալ 2 պատճառներն էլ փոխվել են։

NEWSPRESS.am-ի հետ զրույցում պլաստիկ վիրաբույժ Գոռ Ամիրբեկյանը խոսեց, թե վերջին տարիներին ովքեր են հիմնականում հաճախում պլաստիկ վիրաբույժի մոտ ու ի՞նչ խնդիրներով։

«Մոտ 10 տարի առաջ էսթետիկ վիրահատության համար ավելի շատ դիմում էին աղջիկները ու հիմնականում ցանկանում էին, որ ունենան գեղեցիկ քիթ։ Եթե այդ տարիների ցուցանիշներին հետևենք, ապա տղաները կազմում էին մոտ 20 տոկոս, ովքեր հիմնականում դիմում էին, քանի որ ունեին շնչառական խնդիրներ։ Հիմա թվերը փոխվել են ու շատացել են նաև տղաները, ովքեր հիմնականում գալիս են, որ ունենան գեղեցիկ քիթ։ Կարելի է նշել նաև ականջի վիրահատության (լոշտակության ուղղում) մասին, որի համար նույնպես գալիս են շատ տղաներ։ Հասուն տարիքի կանայք հիմնականում դիմում են մաշկի ձգման ու երիտասարդացման խնդրով։ Շատ են նաև ճարպակալման դեմ պայքարող հիվանդները, որոնց դեպքում ավելցուկային ճարպը հեռացնում ենք մարմնի մեկ մասից և ներարկում մեկ այլ հատված»։

Վիրաբույժն ընդգծեց, որ քթի ու էսթետիկ այլ վիրահատությունների խնդրով հիմնականում դիմում են 20-35 տարեկան մարդիկ։

Գոռ Ամիրբեկյանը խոսեց նաև Հայաստանում պլաստիկ վիրաբուժության մշակույթի ու բացթողումների մասին։

«Օրինակ՝ ԱՄՆ-ում շրթերի մեծացում կարող են անել այն մարդիկ, ովքեր կրթություն ու որակավորում ստանալուց հետո դառնում են պլաստիկ վիրաբույժներ, սակայն Հայաստանում այդպես չէ։ Հայաստանում մարդիկ կան, որ կատարում են շրթերի մեծացում, սակայն չունեն որևէ բժշկական կրթություն։ Այդ իսկ պատճառով շատ են դեպքերը, երբ բժշկական կրթություն չունենալով հանդերձ կատարում են շրթերի մեծացում ու արդյունքում հիվանդն ունենում է շատ խնդիրներ։ Շատ դեպքերում գալիս են մարդիկ ու նշում, որ ցանկանում են ունենալ փոքր քիթ։ Սակայն նայում ես այդ մարդուն ու տեսնում, որ նա ունի շատ գեղեցիկ քիթ։ Շատ անգամ նույնիսկ զգուշացնում ենք, որ վիրահատությունից ամիսներ հետո նա կունենա շնչառական խնդիրներ, սակայն նրանք նշում են, որ անկախ ամեն ինչից պետք է փոքրացնենք։ Այդպիսի դեպքերում էլ բժիշկն է զգուշացնում, որ վտանգավոր է, սակայն մարդն ինքը չի հետևում բժշկի խորհրդին ու վնասում է առողջությունը»։

Գոռ Ամիրբեկյանն ընդգծեց նաև, որ չափի մեջ ու մասնագիտորեն ճիշտ կատարված վիրահատությունները վտանգ չեն կարող առաջացնել։ Նա հավելեց նաև, որ ճիշտ վիրահատություններից բացի կապ ունի նաև մարդու օրգանիզմը, որը շատ դեպքերում տարբեր ձևերով է արտահայտվում օրգանիզմ ներարկված օտար մարմնին։