Հայաստանից թուրքական լոլի՞կ է վերաարտահանվում

Վերջին 6 օրում Հայաստանից Ռուսաստան արտահանվել է շուրջ 2 հազար տոննա լոլիկ․ այս հանգամանքը «Ռոսսելխոզնադզոր»-ի աշխատակիցներին ստիպել է կասկածելու, որ հայաստանյան «Սպայկա» և «Գրինպրոդուկտ» ընկերությունները ոչ թե արտահանում են հայկական արտադրանք, այլ թուրքական լոլիկը վերաարտահանում են։ Հայկական և ռուսական կողմերը համատեղ ուսումնասիրություններ կանցկացնեն հայկական ջերմոցներում՝ ստուգելու լոլիկի համապատասխան քանակների վերաբերյալ ապացույցները։

Նշենք, որ արդեն ոչ մեկ անգամ է, ինչ ռուսական կողմը կասկածներ ունի թուրքական լոլիկի վերաարտահանում իրականացնելու մեջ, նմանատիպ կասկածներ նաև եղել են Ադրբեջանի վերաբերյալ․ ՌԴ-ում թուրքական բանջարեղենի արգելքից հետո, Հայաստանը հնարավորություն է ունեցել ավելացնելու արտահանումը, սակայն դեռևս ռուսներին պետք է ապացուցել, որ լոլիկը հայկական է։

Ի դեպ, ռուսական կողմի կասկածներն այդքան էլ անհիմն չեն․ տարիներ առաջ, երբ ՀՀ օրենսդրությամբ արգելված էր թուրքական սնունդ ներկրելը, Թուրքիայից Վրաստանի տարածքով ներկրում էին սննդամթերք, հիմնականում՝ լոլիկ, և այլ ապրանքի անվան տակ հասցնում Հայաստան։ Նույն այդ փորձված մեթոդներով այժմ էլ ներկրվում է թուրքական լոլիկ, որը և վերաարտահանվում է: Իհարկե, այս ամենն ապացուցելն այնքան էլ հեշտ չէ, քանի որ այն անձինք, ովքեր այս տարիներին զբաղված են եղել մաքսանենգ ճանապարհով լոլիկ ներկրելով, ճարպկորեն կարողանում են նաև վերաարտահանում կազմակերպել։

Իհարկե, այս պահին հայկական ջերմատներում լոլիկ կա, սակայն ոչ այն քանակությամբ, որ հնարավոր լինի 6 օրվա ընթացքում 2 հազար տոննա արտահանել։

NEWSPRESS.am