Հերմինե Նաղդալյան՝ հայի «թուրքականը»

ՀՀ ԱԺ տխրահռչակ պատգամավոր, հանրապետական Հերմինե Նաղդալյանն ապրիլի 7-ին ցանկանում էր լավ բան անել, բայց ստացվեց ինչպես միշտ:

ՀՀԿ կանանց խորհուրդը՝ Նաղդալյանի գլխավորությամբ, այցելել է հիվանդանոց և շնորհավորել մայրացած կանանց:

Առաջին հայացքից սա սովորական, ավելին՝ գեղեցիկ միջոցառում է: Բայց ամեն ինչ շատ ավելի սարսափելի է, քան թվում է:

Հայ մայրերին Հայաստանի պահպանողական կուսակցության կանանց լիդերը նվիրում է թուրքական արտադրության սպիտակեղեն:

Հերմինե Նաղդալյանը, բնականաբար, կիմանա, որ Հայաստանում էլ են արտադրում սպիտակեղեն, գուցե մի քիչ ավելի թանկ, բայց արտադրում են: Ինքը նախընտրում է թուրքականը, որովհետև թուրքականի մեջ, հավանաբար, հոգեհարազատ բան կա:
Այս Հերմինե Նաղդալյանն էր, որ ապրիլյան պատերազմից մի քանի օր անց կանգնեց ու հայտարարեց, որ Հայաստանը պատրաստ կլինի մի քանի շրջան զիջել, եթե աշխարհը ճանաչի Արցախի անկախությունը։ 

Այս Հերմինե Նաղդալյանն էր, որ մեր՝ հարկատուներիս հաշվին 2 միլիոն դրամի կամ իրենց սիրած դոլարային լեզվով ասած՝ 4000 դոլարի հեռախոսով խոսել էր:

Հիշում ենք նաև, որ Հերմինե Նաղդալյանի ու իր ամուսնու թալանի հետևանքով «Նորաշեն» կորպորացիայի մի շարք բնակիչներ մնացին անտուն ու անօթևան:
Ի՞նչ խոսք, թուրքականի երկրպագու Հերմինե Նաղդալյանի մասին ժամերով կարելի է հիշել, չէ՞ որ նա Հայաստանի պատմության առանցքային, հատուկ ընդգծված ստահակներից է…

Ցավն ու սարսափն այն է, որ մի քանի օրից՝ ապրիլի 24-ին, Հերմինե Նաղդալյանը կկանգնի ու կհոխորտա թուրքերի կատարած վայրագությունների մասին՝ մոռանալով, որ ինքը հայ մայրերին նվեր տանելիս նախընտրում է թուրքականը:

NEWSPRESS.am