Քաշքշոցներ ԵՊՀ-ում․ գլխավոր դերում Ալիկ Ղարիբյանն է

Այսօր ԵՊՀ-ում քաշքշուք է տեղի ունեցել ուսանողների ու ԵՊՀ պրոռեկտոր Ալիկ Ղարիբյանի միջև։ NEWSPRESS.am-ի հետ զրույցում ԵՊՀ Հայ բանասիրության ֆակուլտետի ուսանողուհի Անի Հակոբջանյանը պատմեց դեպքի մանրամասները, թե իրականում ի՞նչ է տեղի ունեցել։

«Այսօր առավոտյան մոտ 20 ուսանողներով գնացինք ԵՊՀ-ի կենտրոնական շենք, որ բաժանենք Ազատության հրապարակում տեղի ունենալիք ակցիաների ու հանրահավաքների մասին իրազեկող, ինչպես նաև «Մերժիր Սերժին» ու «Իմ քայլը» լոզունգները պարունակող բուկլետներ։ Ներս մտնելուն պես անվտանգության աշխատակիցները մոտեցան մեզ ու հարցրին, թե ինչո՞ւ ներս մտանք խմբով։ Նրանք մեզ տեսել էին դրսում զրուցելիս։ Մինչ ուսանող տղաները զրուցում էին անվտանգության աշխատակիցների հետ, մենք կարողացանք բարձրանալ վերև ու մի քանի բուկլետներ բաժանել։ Հետո անվտանգության աշխատակիցներն ասացին, որ ներսում բուկլետ բաժանել չի կարելի»։

Ուսանողուհին նշեց, որ քիչ անց ԵՊՀ գրադարանի տարածքից լսեցին բարձր գոռոցներ ու ցած իջան ներքև։

«ԵՊՀ պրոռեկտոր Ալիկ Ղարիբյանը մեզ տեսնելով՝ սկսեց բղավել, գոռալ, քաշքշել տղաներին ու դուրս հրավիրել։ Նա բռնեց իմ ձեռքից, բուկլետներից մի քանիսը պոկեց ու շարունակում էր բարձր գոռալ։ Ես ասացի, որ նա իրավունք չունի ինձ դիպչելու, սակայն Ալիկ Ղարիբյանն ասաց, որ մենք էլ իրավունք չունենք բուկլետ բաժանելու, իսկ ես ասացի, որ այդ ամենը կարելի է հանգիստ ասել։ Մենք դուրս եկանք շենքից ու այնտեղ մեզ հետ զրուցեց ԵՊՀ լրատվական ծառայության ղեկավար և ԵՊՀ ռեկտորի խոսնակ Գևորգ Էմին-Տերյանը, ով շատ հանգիստ ու հանդարտ բացատրեց, որ ԵՊՀ-ի ներսում բուկլետներ բաժանել չի կարելի ու մենք կարող ենք շենքից դուրս ազատ բաժանել ու ուսանողներին իրազեկել»։

Անի Հակոբջանյանը հավելեց նաև, որ ԵՊՀ անվտանգության աշխատակիցներն անկախ ամեն ինչից՝ լավ գիտեն ավելի ակտիվ ուսանողներին, ովքեր իրենց ակտիվությունը ցուցադրում են դեռ տարկետման վերացման դեմ ցույցերում։