Ադրբեջանում խաղաղության կոչի համար «Հայաստանի լրտես» որակված և դպրոցից հեռացված ուսուցիչը դիմել է Ալիևային (վիդեո)

Ադրբեջանի դպրոցներից մեկի անգլերենի ուսուցչին ազատել են աշխատանքից՝ կոչելով նրան «Հայաստանի լրտես»: Այդ մասին անգլերենի ուսուցիչը՝ Ռոշան Ազիզովը, գրել է ֆեյսբուքյան իր էջում: Նա նաև կոչով դիմել է Ադրբեջանի փոխնախագահ Մեհրիբան Ալիևային՝ պահանջելով վերականգնել իրեն աշխատանքում:

Ուսուցչի դեմ բողոքել է Ադրբեջանում գործող «Ղարաբաղի ազատագրում» կազմակերպությունը, որի ներկայացուցիչները, ուսուցչի խոսքով, ներխուժել են դպրոց և տնօրենից պահանջել հեռացնել ուսուցչին դպրոցից: Վերջիններիս նյարդայնացրել է ուսուցչի կազմակերպած միջոցառման տեսանյութը, որտեղ երեխաները կոչ են անում լինել ազատ իրենց գաղափարն արտահայտելիս և անկախ ազգային պատկանելությունից՝ ապրել խաղաղ, սիրել երկիրը, քանի որ սերն է խաղաղություն բերում:

Տեսանյութում երեխաները խաղացել են հայ և ադրբեջանցի երեխաների դերեր, ովքեր սկզբում թշնամաբար են վերաբերվել միմյանց, սակայն հետո հասկացել են, որ թշնամանքը չի կարող հավերժ շարունակվել և բարեկամացել են: Սա էլ զայրացրել է կազմակերպության ագրեսիվ ներկայացուցիչներին:

«Կազմակերպության առաջնորդը պահանջում էր ինձ ձերբակալել: Նրանք ԶԼՄ-ներին հայտարարեցին, թե ես հայ լրտես եմ և անվանեցին ինձ ազգի թշնամի: Դրանից հետո ինձ ազատեցին դպրոցից: Այս ամենը տեղի ունեցավ ինձ հետ՝ աշխարհին արված իմ կոչի համար»,- գրված է ուսուցչի ֆեյսբուքյան էջում:

Այժմ ուսուցիչը կոչով դիմում է Ալիևային և փորձում է միջազգային հանրության ուշադրությունը ևս սևեռել խնդրին: Ազիզովի «մեղքը» այն է, որ նա չի ցանկանում, որ ադրբեջանցի և հայ երեխաները պատերազմեն: Նա ուզում է, որ անմեղ մարդիկ չմահանան, երեխաները չտուժեն:

Տեղադրված տեսանյութում նա նաև նշում է, որ ինքը հաղթել է մրցույթում և բարձրացրել Ադրբեջանի դրոշը, ու հիմա նրան այսպես են փոխհատուցում՝ վռնդում են դպրոցից: Ռոշան Ազիզովը նաև Եվրատեսիլում է ներկայացրել Ադրբեջանը:

Նա չի կարողանում հասկանալ, թե ինչու Ադրբեջանի իշխանությունը չի պաշտպանում իր իրավունքները: Հնարավոր է տարօրինակ հնչի, բայց Ադրբեջանի քաղաքացիները պաշտպանում են ուսուցչի տեսակետը, թեև ակնհայտ ցույց չեն տալիս դա: Նրանցից շատերը ֆեյսբուքյան ֆեյք օգտատերերի անունից գրառում են կատարել Ռոշան Ազիզովի տեղադրած տեսանյութի տակ և ողջունել նրա համարձակությունը:

Ադրբեջանի նման ագրեսոր երկրում, որտեղ ազատ խոսքը դատապարտված է պատժի, մարդիկ չեն համարձակվում պաշտպանել ուսուցչին: Թեև Ազիզովը վստահեցնում է, որ ուսուցիչներից շատերը, երեխաներն ու նրանց ծնողներն ամենևին էլ դեմ չեն իր հայացքներին, սակայն ակնհայտ է, որ վերջիններս վախենում են արտահայտել իրենց տեսակետն ու ուսուցչին դպրոց վերադարձնել:

Այս դեպքի առիթով գործը քննվում է Ադրբեջանի դատարանում, սակայն թերևս կարելի է արդեն իսկ կանխատեսել այս գործի քննության ելքը: