«Ա՛ռ, էս է քո ցեխոտ գնդակը»․ Փաշինյանը «գոլ» խփեց Ռուբեն Հայրապետյանին

«Քայլ արա՝ մերժի՛ր Սերժին» կարգախոսով՝ Նիկոլ Փաշինյանն իր համակիրների հետ շարժվեց դեպի Հայաստանի ֆուտբոլի ֆեդերացիա։ Նրա ձեռքին հնամաշ ու ցեխոտ գնդակ կար։

Թեև պարզ չէր, թե արդյոք այդ պահին ՀՖՖ շենքում էր գտնվում ՀՖՖ նախագահ Ռուբեն Հայրապետյանը, սակայն Փաշինյանն իր կոչն ուղղեց նրան՝ հիշեցնելով 2015 թվականին տված նրա խոստումը, թե կհեռանա պաշտոնից։

2015 թվականի նոյեմբերի 30-ին Red Eagles շարժման անդամների հետ հանդիպման ժամանակ ՀՖՖ նախագահը հայտարարել էր, թե աշխարհի 2018 թվականի առաջնության ընտրական փուլում Հայաստանի ազգային հավաքականի ձախողվելու դեպքում՝ հրաժարական կտա: Նա մասնավորապես ասել էր․

«Եթե չստացվի, ես հեռանալու եմ: Ես գնում եմ: Երբ եմ ասել, թե այս շրջափուլը չեղավ՝ ես կգնամ: Ես ստախոս չեմ: Ես իմ խոսքը պահում եմ. եթե չկարողացա կարգավորել, գնալու եմ»:

«Էդ չէ՞ր քո տղամարդու խոսքը, ինչո՞ւ չես հրաժարվում»,- բարձրախոսով ասաց Փաշինյանը՝ հավելելով․ «Հանրապետական Ռուբեն Հայրապետյանն էլ իր ղեկավար Սերժ Սարգսյանի նման ստախոս է՝ խոսքը չի պահում»:

Այնուհետև Փաշինյանը մոտեցավ ֆեդերացիայի շենքի դռներին և ոտքով հարվածեց կիսամաշ գնդակը դեպի ներս՝ գոչելով․ «Ա՛ռ, էս է քո ցեխոտ գնդակը, ահա քո ցեխոտ գնդակը», ինչին արձագանքելով՝ հավաքված քաղաքացիները բացականչեցին․ «Գո՜լ․․․», և հնչեցին ծափեր։

Այնուհետև հայտարարելով, որ երեկոյան ժամը 18։30-ին Ազատության հրապարակում դարձյալ հավաքվելու են՝ ակցիայի մասնակիցները շարունակեցին ճանապարհը։ Նրանց ուղղված հարցին, թե ո՞ւր են հիմա գնում, նախաձեռնող խմբի անդամները ծիծաղելով բացականչեցին․ «Գնում ենք Սերժին գտնելու»: