«Ընդդիմադիր» «Ծառուկյան դաշինքը» ոչինչ չի անում կանխելու ՍերԺ Սարգսյանի վարչապետ դառնալը

Մեր դաշինքն ընդդիմադիր է, և ընկալելի չի լինի Հանրապետականի թեկնածուին կողմ քվեարկելը: Եթե ընդդիմությունը կողմ է քվեարկում վարչապետին՝ կառավարության ղեկավարին, այսինքն՝ հավանություն է  տալիս կառավարության ծրագրին, դրանից հետո դու այլևս ընդդիմություն լինելու խնդիր ունես:

«Ազատություն» ռադիոկայանի հետ զրույցում մոտավորապես այս տեսակետն են արտահայտել «Ծառուկյան դաշինքի» պատգամավորներ Սերգեյ Բագրատյանն ու Նաիրա Զոհրաբյանը: 

Այսօր արդեն հայտնի է, որ իշխող կուսակցության թեկնածուն ՀՀ-ն 10 տարի փաստացի ղեկավարած Սերժ Սարգսյանն է: Այն Սարգսյանը, ում ընտրվելու ժամանակ բազմաթիվ ընտրակեղծիքներ են տեղի ունեցել: Այն Սարգսյանը, ում կառավարման օրոք հարուստներն ավելի են հարստացել, աղքատներն՝ ավելի աղքատացել: Այն Սարգսյանը, ում ղեկավարած տարիներին հազարավոր հայ ընտանիքներ անվերադարձ մեկնել են երկրից: Այն Սարգյսանը... «Այն Սարգսյանը...» շարքը երկար կարող ենք թվել ու ոչ մի նոր բան չասել, որովհետև ոչ ոքի համար էլ գաղտնիք չէ, որ Սերժ Սարգսյանի նախագահության տարիներն ամենևին էլ ամենաերջանիկներից չէին հայաստանցիների համար: 

Այժմ արդեն պաշտոնապես հայտնի է, որ հենց այդ Սարգսյանն է պատրաստվում կառավարել երկիրը, իսկ «Ծառուկյան դաշինքը»՝ որպես ընդդիմություն, փաստացի ոչինչ չի անում կանխելու Սարգսյանի վարչապետ դառնալը: 

Մեկ այլ ընդդիմադիր Նիկոլ Փաշինյանը, անկախ այն բանից, թե սեփական կամքով է փողոցում, թե, ասենք, նույն Սերժ Սարգսյանի, բայց գոնե փողոցում է, պայքարում է, ինչ-որ բաներ փորձում է ասել ու անել, ինչպես ասում են, ժողովրդի համար գոնե սրտահովանք է՝ հավաքվում են, հայտնում բողոքը, մի քանի թթու խոսք ասում իշխանություններին ու մի քիչ հանգստանում: 

Իսկ ձևով ընդդիմադիր, բովանդակությամբ իշխանական դաշինքը, ոչ միայն ոչ մի կերպ չի պայքարում Սերժ Սարգսյանի վարչապետության դեմ, այլև բացահայտ ու բառացի ասում է, որ Հանրապետականի թեկնածուին դեմ է քվեարկելու ոչ թե այն պատճառով, որ Սերժ Սարգսյանը մերժելի ու անցանկալի թեկնածու է, այլ ընդամենը մեկ բանի համար, որ պահի ընդդիմադիրի իր դեմքը: Այլ խոսքով՝ այս թոհուբոհում դաշինքը սեփական կաշին է փրկում: 

Ու դաշինքում լավ են հասկանում, որ Սերժ Սարգսյանն իրենց ձայների կարիքն ամենևին չունի. միայն Հանրապետական պատգամավորների քանակը լիովին բավարարում է վարչապետի պաշտոնում ընտրվելու համար: 

Այսքանից հետո, թե որտե՞ղ, քանի՞ սարի հետևում են մնում Բագրատյանի ու Զոհրաբյանի «ընդդիմադիր ենք» հոխորտումները, միայն իրենց է հայտնի:

Սերժ Սարգսյանը,այո՛, դառնալու է վարչապետ, և դա ԱԺ-ում ոչ թե միայն ՀՀԿ-ի և ՀՅԴ-ի, այլև ամբողջ ԱԺ-ի ցանկությունն է: Բոլորի: Անխտիր: 

Երկրում միակ իրական ընդդիմությունը ժողովուրդն է: Չարքաշ աշխատանքով, հանապազօրյա հացն աղի քրտինքով աշխատող ժողովուրդը:

Մնացածը բարձր ամբիոններից ճառ ասողներ են:

NEWSPRESS.am