Նպատակը չի արդարացնում միջոցները. փողոցի շրջափակումը անօրինական է. Ռուստամյան

«Ընդդիմությունը միշտ պիտի փորձի աշխատել օրենքի շրջանակներում, եթե օրենքից դուրս է գալիս, իշխանությանը թույլ է տալիս աշխատել այն զինանոցով, որով թույլատրվում է»:

ԱԺ ճեպազրույցների ժամին ակցիայի վերաբերյալ իր տեսակետը հայտնեց ԱԺ «Հայ Յեղափոխական Դաշնակցություն» խմբակցության ղեկավար Արմեն Ռուստամյանը:

«Որևէ տեղ տեսե՞լ եք, որ կարելի է մտնել ռադիոյի շենք գրավել, գլխավոր փողոցները փակել, ո՞ր մի երկրում է դա թույլատրված, ոչ մի... »,-նշեց Ռուստամյանը՝ հավելելով, որ որևէ երկրում նման գործողություններն օրինական չեն համարվում:

«Սերժ Սարգսյանի վարչապետության դեմ պայքարողներն առաջնորդվում եմ «նպատակն արդարացնում է միջոցները» սկզբունքով, ինչը միշտ վատ հետևանքների է բերում: Մենք տեսել ենք օրեր շարունակ փակ փողոցներ, դրանք, ի վերջո, բացվել են, հարցն այն է, որ դրանք այնպիսի գործողություններ են, որոնք հանգեցնելու են համապատասխան արձագանքի իշխանության կողմից»,-նշեց ՀՅԴ խմբակցության ղեկավարը:

Նա չի կարծում, թե այս ամենի պատճառով ԱԺ հատուկ նիստը կտեղափոխվի այլ վայր:

«Ի՞նչ է նշանակում` ԱԺ հատուկ նիստի անցկացման տեղը փոխել։ Անիմաստ գործողություններով մենք չենք պատրաստվում զբաղվել։ Ի՞նչ տարբերություն, այս վայրը, թե այն վայրը շրջափակեն։ Կարծում եմ՝ ԱԺ-ն իր տեղում է, դա այն վայրն է, որտեղ պիտի նիստերը գումարվեն, ոչինչ չի կարող խոչընդոտել»,- ասաց Ռուստամյանը: