Նիկոլին վերջին անգամ տեսել են փշալարերն անցնելիս. նրա ձեռքերը արյունոտ են եղել (ֆոտո, վիդեո)
Բաղրամյան պողոտայում՝ Ազգային ժողովի մոտ բախում տեղի ունեցավ քաղաքացիների և ոստիկանների միջև: Մինչ այդ Նիկոլ Փաշինյանը փորձում էր համոզել ՀՀ ոստիկանության Երևան քաղաքի վարչության պետի տեղակալ, ոստիկանության գնդապետ Վալերի Օսիպյանին բացել իր ճանապարհը:
«Ես պատգամավոր եմ և պատրաստվում եմ գնալ ԱԺ՝ աշխատանքի»,-ասաց Փաշինյանը, սակայն Օսիպյանը նրան չզիջեց:
Նա նշեց, որ այդ կերպ Փաշինյանը տանում է ժողովրդին բախման:
«Պարոն Փաշինյան, ես գիտեմ ձեզ, որ դուք պատգամավոր եք, բայց դուք ձեր այս քայլով բախման եք տանում մարդկանց»,- ասաց Օսպյանը:
Փաշինյանը չլսեց նրան, և անցավ իրար կողքի շարված երկաթների վրայով: Նրա այդ քայլից ոգևորված ժողովուրդը հետևեց իր «առաջնոդին»:
Նիկոլը, փաստորեն, ժողովրդին տարավ բախման:
Ցուցարարները բախվեցին ոստիկանների հետ, այնուհետև առաջ շարժվելով՝ հանդիպեցին ոստիկանական փշալարերին: Փաշինյանն ինչ-որ կերպ փորձեց հաղթահարել փշալարերը, սակայն նրան դա չհաջողվեց: Ոստիկանները հոտավետ ծուխ արձակեցին քաղաքացիների վրա և կիրառեցին համապատասխան միջոցներ՝ նրանց հետ մղելու համար:
Քաղաքացիներն սկսեցին նահանջել: Նրանցից մի քանիսը վիրավորվեցին: Ուշագրավ է սակայն, որ ծուխն անցնելուց հետո, Փաշինյանը գոնե առայժմ չի երևում տարածքում:
Նրան տեսնողներ են եղել փշալարերի այն կողմն անցնելիս և արյունոտ ձեռքերով:
