«Կոշիկս է պոկվել միայն ու հագուստս պատռվել. կգնամ կփոխվեմ ու կվերադառնամ». Փաշինյանը դեռ հիվանդանոցում է

Ոստիկանության և քաղաքացիների բախումից հետո Նիկոլ Փաշինյանը տեղափոխվել է «Նաիրի» բժշկական կենտրոն: Նրան օգնել են հիվանդանոց տեղափոխել երկու ակտիվիստ, ովքեր ներկայացել են Արուս և Դավիթ անուններով:

Արուսն ու Դավիթը պատմեցին, թե ինչպես է Նիկոլին հաջողվել անցնել փշալարերն ու հայտնվել ոստիկանության թիկունքում: Նրանք նշեցին նաև, որ լինելով Նիկոլի կողքին՝ իրենց ևս հաջողվեց նրա հետ անցնել փշալարերը, սակայն նրանք վնասվածքներ չեն ստացել:

Փշալարերը ճեղքելու և անցնելու հետևանքով վնասվել են Նիկոլ Փաշինյանի ձեռքերը: Նա հայտարարել է, որ առաջին բուժօգնություն ստանալուց հետո վերադառնալու է հանրահավաքի մասնակիցների մոտ:

Բժշկական կենտրոնից հայտնում են, որ վնասվածքը ծանր չէ, բայց թույլ չեն տալիս այցելել Փաշինյանին՝ պատճառաբանելով, թե դա էթիկայի նորմերի տեսանկյունից ճիշտ չէ:

Մյուս կողմից էլ՝ բուժանձնակազմը դեմ չէր լրագրողներին ուղեկցել Փաշինյանի մոտ, եթե նա չի առարկում:

Նիկոլ Փաշինյանը լրագրողների հետ հանդպման ժամանակ նշեց, որ ոստիկանության նման քայլը կանխատեսելի էր, բայց նշեց, որ չի նահաջելու:

«Ես իմացա, որ ժողովուրդը դեռ այնտեղ է և չի ուզում ցրվել: Ուրախ եմ, որ մարդիկ հավատում են փոփոխության...»,- ասաց Փաշինյանը:

Անդրադառնալով իր առողջական վիճակին՝ նա նշեց, որ վատ չի զգում և պատրաստվում է վերադառնալ ցուցարարների մոտ:

«Կոշիկս է պոկվել միայն ու հագուստ պատռվել է. կգնամ տուն, կփոխվեմ ու կվերադառնամ մարդկանց մոտ: Ես դեռ հայտարարություն ունեմ անելու... այն, ինչ ամբողջ օրը իրականացրինք, չի փոխվելու այս միջադեպից, նույն մարտավարությունը պետք է շարունակենք»,-ասաց Փաշինյանը: Իսկ թե որքանով դա նրան կհաջողվի հարցին, Փաշինյանը պատասխանեց. «Կապրենք, կտեսնենք»...