Դեսպանն իր կամքով նկարը տվեց, ասեց՝ տարեք, վառեք. Մարսելում այրել են Սերժ Սարգսյանի նկարը (տեսանյութ)

Ֆրանսիայի Մարսել քաղաքից մի խումբ հայեր ուղերձ են հղել հայաստանաբնակ հայրենակիցներին և իրենց աջակցությունը հայտնել ընդդեմ իշխանությունների պայքարում: 

«Ձեր պայքարն արդար է, պայքարն ուղղված է արդար իշխանության վերականգնմանը, քաղբանտարկյալների ազատմանը և ամենակարևորը՝ հանցավոր իշխանության և Սերժ Սարգսյանի գլխավորությամբ կազմված կլանային իշխանության վերացմանը և դեմոկրատիայի հաստատմանը ՀՀ-ում:

Մենք, լինելով ՀՀ քաղաքացիներ՝ թեև գտնվում են Հայաստանի սահմաններից դուրս, բայց այժմ գտնվում ենք ՀՀ հողի, այսինքն՝ ՀՀ հյուպատոսարանի առջև և քիչ առաջ զրույց ունենալով Հայաստանի Հանրապետության արտակարգ և լիազոր հյուպատոսի հետ Մարսելում՝ նրանց հաղորդեցինք մեր բողոքի նոտան՝ ուղղված Հայաստանում կատարվող իրադարձությունների դեմ և ներկայացրինք մեր արդար պահանջները: 

Եվս մեկ անգամ, ներկաներս՝ Մարսելի ամբողջ հայության անունից, խոստանում ենք, որ ՀՀ անօրինական կառավարության ցանկացած ներկայացուցիչ Մարսելում ստանալու է ոչ հյուրընկալ ընդունելություն՝ բողոքի ակցիաներ, անհնազանդության ակցիաներ և արդար բողոքի արտահայտում: Պահանջում ենք արդարության վերականգնում, ուսանողների հանդեպ հալածանքների դադարեցում, մտավորականության հանդեպ կատարվող ճնշումների դադարեցում և ՀՀ-ում, ի վերջո, օրինական իշխանության հաստատում: 

Շնորհակալություն ձեզ բոլորիդ, պինդ եղեք և իմացեք, որ արտասահմանում ձեր հայրենակիցները ամբողջ ոգով և զորությամբ ձեր կողքին են»,- ասված էր Մարսելում ապրող հայերի ուղերձում: 

Դրանից հետո նրանք վանկարկել են. «Քայլ արա, մերժի՛ր Սերժին»:

Ցուցարար կանանցից մեկն էլ բղավել է. «Մեր ազգային հերոսներին սպանեցին մեր աչքի առաջ՝ խայտառակ, լկտի ձևով, ո՞վ բողոքեց, դրա համար էլ շարունակվում ա»:

Ի պատասխան՝ մի տղամարդ էլ ասաց. «Մենք վախկոտ ժողովուրդ ենք, մի փոր հացի համար ամեն ինչի ընդունակ ենք: Ով որ Ղարաբաղի համար արյուն ա թափել, բռնեց փակեց»: 

Դրանից հետո բողոքի ակցիայի մասնակիցները կոտրել են Սերժ Սարգսյանի նկարով շրջանակի ապակին, ապա այրել լուսանկարը: «Այ, քեզ էս ա սպառնում, Սերժիկ, Մարսելի կողմերը մի երևա»:

Ակտիվիստներից մեկն էլ նշեց, որ Սերժ Սարգսյանի նկարը դեսպանն է տվել իրենց. «Դեսպանը կամավոր էս նկարը տվեց ասեց՝ տարեք, վառեք, ախպեր: Է՞դ չի Սերժի նշանակած դեսպանը»: