Եղվարդ-Երևան երթուղին չի գործում. ՀՀԿ-ական քաղաքապետն «արջի ծառայություն» է մատուցում

Արդեն երկու օր է՝ Եղվարդ-Երևան երթուղին չի գործում: Եղվարդցիները Երևան են հասնում ինչով պատահի և ինչպես պատահի:

Եղվարդի քաղաքապետ Նորայր Սարգսյանից այս մասին NEWSPRESS.am-ին չհաջողվեց պարզաբանում ստանալ, քանի որ վերջինս գտնվում է արձակուրդի մեջ: Համենայնդեպս, այդպես մեզ փոխանցեցին քաղաքապետարանից: Թե ինչու է Հանրապետական քաղաքապետը որոշել այս շրջանում արձակուրդի գնալ, պարզ չէ: Չի բացառվում, որ նա այս կերպ խուսափում է պատասխանատվությունից՝ փորձելով միաժամանակ «արջի ծառայություն» մատուցել իր կուսակցությանը:

Ու թեև քաղաքապետի տեղակալ Կարեն Հարությունյանը մեզ հետ զրույցում նշեց, որ քաղաքապետարանը պատասխանատու է միայն միջքաղաքային տրանսպորտի հետ կապված խնդիրների համար, սակայն հարկ է նկատել, որ, փաստորեն, մայրաքաղաքի հետ կապող միակ երթուղին այսօր չի աշխատում, և քաղաքապետարանը պարզապես պարտավոր է խնդրին լուծում տալ:

Արդյո՞ք քաղաքապետարանը չպետք է միջամտի խնդրի լուծմանը, երբ, փաստորեն, արդեն երկու օր է՝ եղվարդցիները չեն կարողանում Երևան հասնել: Փոխքաղաքապետին ուղղված այս հարցը կարծես թե այնքան էլ դուր չեկավ նրան, և Կարեն Հարությունյանն արձագանքեց.

«Խնդիրը կուսումնասիրենք և եթե տեսնենք՝ անհրաժեշտություն կա, կմիջամտենք»,-ասաց նա:

Չի բացառվում, որ քաղաքապետարանը հարցին կմիջամտի այն ժամանակ, երբ Երևանում ցույցերն ու բողոքի ակցիաներն այլևս անցյալում կլինեն: