«Երեխեք ջան, հանե՛ք ձեր բոլոր դպրոցներից Սերժ Սարգսյանի դիմանկարը և շպրտե՛ք պատուհաններից, շպրտե՛ք...». Նիկոլ Փաշինյան

«Քաղաքացիական պայմանագիր» կուսակցության ղեկավար Նիկոլ Փաշինյանն այսօր Հանրապետության հրապարակում հանրահավաքի մասնակիցների առաջ ելույթ ունենալով, անդրադարձավ նաեւ ԿԳՆ կոչին՝ դպրոցականներին չներքաշել քաղաքականության մեջ:

Փաշինյանն ասաց, որ նախ, իրենք որեւէ մեկին չեն ներքաշում որեւէ բանի մեջ,  ապա նաեւ հիշեցրեց, որ նույն այդ երեխաներին որոշ ժամանակ առաջ հենց նրանք են ստիպողաբար փուչիկները ձեռքները տալով մասնակիցը դարձրել Սերժ Սարգսյանի ու ՀՀԿ-ի քարոզարշավին: «Երեխեք ջան, հանե՛ք ձեր բոլոր դպրոցներից Սերժ սարգսյանի դիմանկարը եւ շպրտե՛ք պատուհաններից, շպրտե՛ք: Դուք պետք է սովորեք, որ ՀՀ քաղաքացին չի կարող ծնկի գալ որեւէ մեկի առաջ»,-հայտարարեց Նիկոլ Փաշինյանը:

Դրանից հետո հանրահավաքի մասնակիցների մի մասը սկսեց վանկարկել «ՆԻ-կոլ, Նի-կոլ», սակայն Փաշինյանն ընդհատեց նրանց՝ ասելով. «Մի րոպե էլի, էն մյուս կողմից ավելի կարեւոր բան են ասում՝ դա-սա-դուլ, դա-սա-դուլ»:

Ապա Նիկոլ Փաշինյանը կոչ արեց հանրապետության բոլոր դպրոցականներին՝ դասադուլ անել: