Ոստիկանները բերման են ենթարկում մարդկանց, իսկ Փաշինյանը կոչ է անում քաղաքացիներին չբախվել

Նիկոլ Փաշինյանի գլխավորած նախաձեռնության մասնակիցները շրջափակել են Կառավարության 3-րդ շենքը: Նրանք այս կերպ փորձում են խոչընդոտել կառավարության աշխատակիցների աշխատանքը և, մասնավորապես նորընտիր վարչապետ Սերժ Սարգսյանի գլխավորությամբ տեղի ունեցող նիստը:

Հարկ է նկատել, որ այն վայրում, որտեղ ակտիվիստները կողք-կողքի կենդանի պատով փակել են կառավարության աշխատակիցների մուտքը դեպի շենք, կենդանի պատով ակտիվիստների մուտքն արգելափակել են ոստիկանության աշխատակիցները, ովքեր անհամեմատ ավելի շատ են ցուցարարներից:

Շենքի մի հատվածում ոստիկանները կանգնած էին երկու շարքով, նրանց միացան նաև կարմիր բերետավորներն, ովքեր հեռացրին քաղաքացիներին տարածքից: Նրանք մի քանիսին բերման ենթարկեցին, իսկ Փաշինյանին թողեցին, քանի որ նա անձեռմխելիության իրավունք ունի:

Այն ժամանակ, երբ կարմիր բերետավորներն ուժով հեռացնում էին ակտիվիստներին, Փաշինյանը վերջիններիս կոչ էր անում, որ ոչ մի դեպքում վիճաբանության մեջ չմտնել ոստիկանների հետ և չբախվել:

Կարմիր բերետավորներին հաջողվեց կառավարության շենքի այդ հատվածում ցրել ցուցարարներին: Այս ամենն առաջացրեց ցուցարարներից մեկի զայրույթը: Նա դիմեց Փաշինյանին:

«Պարոն փաշինյան, ոստիկանները կառավարության աշխատակիցբներին են պաշտպանում, մենք եկել ենք նրանց ենթարկվելո՞ւ, թե՞ մեր իրավունքները պաշտպանելու»,-հարցրեց քաղաքացին:

«Ամեն դեպքում չենք բախվելու»,-պատասխանեց Փաշինյանը:

«Բայց առանց բախման ոչ մի բանի չենք հասնի, գան ցրեն  ձեռք չտանք»,- վրդովվեց քաղաքացին:

Նկատենք, որ ոստիկանները քաղաքցիներին բերման են ենթարկում նաև կառավարության մյուս շրջափակված հատվածներից:

Սա Փաշինյանի մարտավարությունն է՝ ցրել ժողովրդին, որպեսզի ոստկանները չկարողանան բոլորին միանգամից ցրվել: