Ես գերեզմանի մեջ շուռ կգամ, եթե իմանամ՝ հաջորդ սերունդներն Արցախը հանձնել են Ադրբեջանին. Սերժ Սարգսյան

Բանակցային պրոցեսը պետք է շարունակվի. մենք մեր դիրքորոշումները չենք փոխելու Արցախի հարցում: Այդ մասին «Շանթ» հեռուստաընկերությանը տված հարցազրույցում ասաց ՀՀ նորընտիր վարչապետ Սերժ Սարգսյանը՝ պատասխանելով հարցազրուցավար Արամ Աբրահամյանի հարցին՝ կապված Լեռնային Ղարաբաղի հակամարտության խնդիրը հաջորդ սերունդներին թողնելու հետ: 

«Երբ որ Դուք ասում եք՝ ուրիշ (նկատի ունի ուրիշ մարդիկ, ովքեր կգան կառավարման-հեղ.), ես մի քիչ մտահոգվում եմ, ուրիշ, այսինքն՝ ի՞նչ: Հայաստանում կարող գալ մարդիկ, ովքեր կհամաձայնե՞ն Արցախը հանձնել Ադրբեջանին: Ինձ համար դա անհասկանալի է»: 

Արամ Աբրահամյանը հստակեցրեց՝ խոսքը փոխադարձ զիջումների մասին է. «Եթե հաջորդ սերունդների մասին է խոսքը, ես կարող է գերեզմանում շուռ գամ՝ էդպիսի բան լսելով»:

Ըստ Սերժ Սարգսյանի՝ ամբողջ խնդիրն էլ հենց այն է, որ ադրբեջանցիներն այն պատրանքն ունեն, թե փոխզիջում նշանակում է զիջումներ միայն հայկական կողմերի կողմից: Նա կարծում է, որ երբ մեր հակառակորդը հասկանա՝ փոխզիջում նշանակում է զիջում և՛ հայկական կողմերի կողմից, և՛ ադրբեջանական կողմի կողմից, այդ ժամանակ խնդիրը կարող է լուծվել:

«Մենք այլ ճանապարհ չունենք, եթե ունենայինք այլ ճանապարհ, այսինքն՝ առանց զիջումների՝ ասեինք՝ ամբողջը մերն է և վերջ, միգուցե կարելի էր դրան գնալ, բայց չունենք այդպիսի ճանապարհ, դա խաղաղության ճանապարհը չէ, խաղաղության ճանապարհը համաձայնության գալն է: Համաձայնության գալու համար անհրաժեշտ է երկու կողմի կարծիքը: Մեր ամենակարևոր խնդիրը պետք է՝ լինի ամեն օր, ամեն ժամ աշխատել հայկական Զինված ուժերի մարտունակությունը պահպանելու և զարգացնելու վրա: Սա է ամենառեալ միջոցը՝ կայունությունը պահպանելու: Իհարկե, մենք պետք է զարգացնենք, խորացնենք մեր հարաբերությունները մեր դաշնակիցների հետ, որովհետև նրանցից էլ է շատ բան կախված, բայց ամենահիմնականը հայ զինվորն ու սպան է»: