Երվանդ Վարոսյանն Արա Զոհրաբյանին կոչ է անում իշխանություններին հաճոյանալ սեփական անունից, ոչ թե ՓՊ-ի

Փաստաբան Երվանդ Վարոսյանը ֆեյսբուքյան իր էջում գրառում է արել, որով մերժել է ՓՊ նախագահ Արա Զոհրաբյանի ստորագրությամբ տարածված հայտարարությունը:

«Որպես փաստաբան պաշտոնապես հայտարարում եմ, որ մերժում եմ Փաստաբանների պալատի ու փաստաբանական ինչ-որ «համայնքի» անունից Արա Զոհրաբյանի ստորագրությամբ նախօրեին տարածված հայտարարությունը` ծավալվող իրադարձությունների վերաբերյալ մտահոգության, խաղաղ հավաքների իբր բռնությամբ զուգորդվելու, անչափահասների մասնակցությունը անթույլատրելի համարելու, թավշյա հեղափոխությունների ծանր հետևանքների վերաբերյալ խիստ ուրույն դատողությունների մասին։

Կոչ եմ անում Փաստաբանների պալատի ղեկավարությանը զբաղվել այն գործունեությամբ, որին կոչված են և որի համար աշխատավարձ են ստանում փաստաբանների մուծած անդամավճարներից։ Իսկ իշխանություններին հաճոյանալու, դրանով գուցե իրենց ապագա «առաջխաղացումն» ապահովելու նպատակով արվող հայտարարությունները հնչեցնել սեփական անունից, այլ ոչ թե Փաստաբանների պալատի»,- գրել է Վարոսյանը: 

Հիշեցնենք, որ ՀՀ փաստաբանների պալատի նախագահ Արա Զոհրաբյանի ստորագրությամբ՝ 20.04.2018թ. արված հայտարարության մեջ ասված էր. 

«Հայաստանի Հանրապետության փաստաբանների պալատն օրեր շարունակ մեծ մտահոգությամբ հետևում է երկրում տեղի ունեցող գործընթացներին, որոնք ցավոք այսօր սկսեցին զուգորդվել ընդգծված բռնությամբ։ Վտանգավոր այս տենդենցը հուշում է որ քաղաքական նպատակներով ձևավորված խաղաղ հավաքները կարող են ունենալ անդառնալի հետևանքներ։

Անթույլատրելի է խաղաղ ցուցարարների նկատմամբ բռնություն կիրառելու և բերման ենթարկելու գործելաոճը, ինչպես նաև անընդունելի են ցուցարարների շարքերում տեղի ունեցող որոշ քաղաքացիների սադրանքները՝ իրենց բոլոր հետևանքներով։ Անընդունելի ենք համարում առաջին գծում աշխատող լրագրողների հանդեպ կիրառվող բռնության և անհանդուրժողականության դեպքերը, որոնք ոչ միայն դատապարտելի են, այլև դեմ են ժողովրդավարական արժեքներին և իրավական պետության առաջնահերթություններին։

Փաստաբանների պալատը դատապարտում է ազատ տեղաշարժման իրավունքի խախտումներն ու արտահայտվելու իրավունքի հանդեպ որևէ ոտնձգության փորձ։ Միևնույն ժամանակ չենք կարող չանդրադառնալ հավաքներին անչափահասների և անգամ մանկահասակ երեխաների մասնակցության անթույլատրելիությանը։

Նման սցենարներ պատմության մեջ հատկապես վերջին տարիներին շատ են կրկնվում։ Չէինք ցանկանա ավելորդ խուճապի առիթ ստեղծել, ինչպես նաև քաղաքականացնել մեր մոտեցումը, սակայն լինելով հայրենասեր և սրտացավ համայնք, չենք կարող չհիշել թավշյա հեղափոխությամբ սկսված և եղբայրական արյունահեղությամբ զուգորդված, արդյունքում տարածքային կորուստներ կրած և պատերազմական դրությունից ուշքի չեկող երկրների դաժան փորձը։

Հորդորում ենք այս գործողությունների կազմակերպիչներին չառաջնորդվել միայն ներքին քաղաքականության փոփոխության մտքով, հիշել երկրի արտաքին մարտահրավերների և խնդրահարույց թեմաների մասին։

Կոչ ենք անում ցուցաբերել զսպվածություն և գործել միայն իրավական պետության և ժողովրդավարության սկզբունքներով։

Հիշեցնում ենք, որ ՀՀ փաստաբանների պալատի կողմից ձևավորված առաջին իրավաբանական անվճար օգնություն տրամադրող փաստաբանների խումբը շարունակում է տրամադրել անվճար իրավաբանական օգնություն ցույցերի ընթացքում բերման ենթարկված քաղաքացիներին և շարունակելու է արձագանքել իրեն դիմած բոլոր ցուցարարներին»։