Փոխվարչապետ Կարեն Կարապետյանը մեկնեց Նիկոլ Փաշինյանի հետ հանդիպման

Քիչ առաջ նախագահական նստավայրում տեղի է ունեցել խորհրդակցություն, որին մասնակցել են ՀՀ վարչապետ Սերժ Սարգսյանը, նախագահ Արմեն Սարգսյանը, առաջին փոխվարչապետ Կարեն Կարապետյանը և ԱԺ նախագահ Արա Բաբլոյանը:

Հանդիպումից հետո առաջին փոխվարչապետ Կարեն Կարապետյանը հայտարարությամբ հանդես եկավ:

«Այսօր մենք որոշում ենք կայացրել, և ես դիմելու եմ գլխավոր դատախազին, որպեսզի միջնորդությունն Ազգային ժողովի պատգամավորների վերաբերյալ Ազգային ժողովից հետ վերցվի, և ես այս պահին գնում եմ Նիկոլ Փաշինյանի մոտ հանդիպման, որպեսզի բանակցենք և լուծում գտնենք: Վաղվա օրը չափազանց կարևոր է, և ես կարծում եմ, որ մենք այնքան տրամաբանություն և սթափություն կունենանք, որպեսզի աշխարհին ցույց տանք, որ մենք՝ հայերս, անկախ այն բանից, թե որքան չլուծված հարցեր, նեղվածություն ունենք, կարող ենք նստել և տրամաբանական լուծում գտնել»,- ասաց առաջին փոխվարչապետը:

Նա չպատասխանեց լրագրողների հարցերին, քանի որ շտապում էր Փաշինյանի հետ հանդիպման: 

Հիշեցնենք, որ երեկ՝ ապրիլի 22-ի առավոտյան վարչապետ Սերժ Սարգսյանի և «Մերժիր Սերժին» շարժման առաջնորդ Նիկոլ Փաշինյանի միջև տապալված բանակություններից մեկ ժամ անց ակցիայի վայրից՝ Արցախի փողոցին Նիկոլ Փաշինյանին ու նրա խորհրդարանական ընկերներ Արարատ Միրզոյանին ու Սասուն Միքայելյանին բերման ենթարկեցին: 

Ավելի ուշ դատախազությունը հայտնեց նրանց ձերբակալման մասին: