Ինչի՞ց է վախենում Կարեն Կարապետյանը

Արդեն երկրորդ անգամ Կարեն Կարապետյանը չի գալիս Նիկոլ Փաշինյանի հետ բանակցելու: Ինչո՞ւ: Իհարկե, մի քանի տարբերակ կարելի է քննարկել, սակայն ակնհայտ է, որ զգուշանում է:

Նախ՝ Նիկոլը սուր լեզու ունի, որին իր լեզվական բառաշերտում ռուսական տարրեր կրող մարդու համար դժվար է հավուր պատշաճի պատասխանել, երկրորդը` ենթադրվում է, որ ինչ էլ Փաշինյանն ասի, ի վերջո, Կարեն Կարապետյանը սխալ է դուրս գալու, այն պարզ պատճառով, որ նա ՀՀԿ-ական է:

Հաջորդը` չի բացառվում, որ բանակցությունները գնան անվերահսկելիության հունով և Կարեն Կարապետյանի համար անսպասելի և անցանկալի ելք կունենան` առանց PR-ն ապահովողների:

Ինչի՞ց է վախենում Նիկոլ Փաշինյանը

Արդեն ակնհայտ է, որ լրագրողների ներկայությամբ բանակցությունները Կարեն Կարապետյանի համար անընդունելի են և տեղի չեն ունենա: Երկրորդ առաջարկը՝ հանդիպելու և բանակցելու, Նիկոլը հաստատ կանխատեսել էր, որ Կարեն Կարապետյանը չի գալու:

Ի վերջո, այս ընթացքում Նիկոլ Փաշինյանն առանց ԶԼՄ-ների ներկայության հանդիպել է և՛ Արմեն Սարգսյանի, և՛ ԲՀԿ ղեկավարի, և՛ ՀՅԴ ներկայացուցիչների հետ: Ինչո՞ւ հենց Կարեն Կարապետյանի հետ հանդիպումը պետք է անցնի լրագրողների ներկայությամբ:

Ինչպես հայտնի է, որևէ բանակցություն ԶԼՄ-ների ներկայությամբ չի անցնում, նման պրակտիկա չկա, քանի որ բանակցությունների ժամանակ շոշափվում է փաթեթի մեծ սպեկտր, երբեմն խիստ գաղտնի, որոնք չպետք է հանրայնացվեն: Այնպես չէ, որ Փաշինյանն այդ մասին տեղյակ չէ, ուղղակի նման հանդիպումներին Կարեն Կարապետյանի չգնալը Նիկոլ Փաշինյանի համար իսկական տոն է. Միայնակ շփվում է նախկին կոլեգաների հետ, զվարճախոսում Կարեն Կարապետյանի հասցեին և ասում այն, ինչ ցանկանում է: Այս պահի դրությամբ նա ալիքի կատարին է և կարող է հանդիպում թելադրել, սակայն դեռևս ստիպել չի կարող:

Ի՞նչ է սպասվում

Իհարկե, դժվար է կանխատեսել, թե ինչ է լինելու, քանի որ ինչպես անսպասելի էր Սերժ Սարգսյանի հրաժարականը, այնպես էլ հայտնի չէ, թե հայաստանյան իրադարձություններն ի՞նչ հունով կընթանան: Ի դեպ, երկու կողմն էլ իր զգուշացումներն ու վախերն ունի: Իրավիճակը կարող է այնպես փոխվել, որ երկու կողմն առանձին-առանձին չկարողանան տիրապետել իրավիճակին, այդ իսկ պատճառով շոշափում են միմյանց թույլ և ուժեղ կողմերը և առայժմ փորձում են միավորներ հավաքել:

NEWSPRESS.am