«Ո՞վ է Հանրապետական՝ ե՞ս․․․»․ «հերոս» գեներալը «մուկ» է դարձել՝ դողում է

Որքան էլ հանրապետականները բարձրաձայնեն ու փորձեն իրենց համոզել, մեզ վստահեցնել, թե կուսակցությունից առնետավազք չկա, սակայն իրականությունն այլ բան է ցույց տալիս։ Որոշներն իսկապես իրենց արդեն անվտանգ չեն զգում Հանրապետական կուսակցությունում ու, մեղմ ասած, «պրիզնատ» չեն գալիս «մայր գետին»։

Այս առումով թերևս ՀՀԿ-ական գեներալ Մանվել Գրիգորյանն ինքն իրեն գերազանցել է։
Նա, ով մասնակցում էր ՀՀԿ նիստերին, խնջույքներին (անկախ նրանից, թե սահմանին ինչ վիճակ է), քննարկումներին ու առույծ կտրած «դոշ տալիս» ՀՀԿ-ի ու Սերժ Սարգսյանի համար, հայտարարում է, թե ինքը ո՛չ թե կուսակցության անդամ է, այլ պարզապես ԱԺ Հանրապետական խմբակցությունում ներկայացնում է «Երկրապահ կամավորներին»։

Սա, իհարկե, խեղկատակություն է․ գեներալը, ում սուրն աջ ու ձախ կտրում էր՝ վիրավորելով իր ճանապարհին բոլորին, իր «հպատակներին» ուղղում էր իրեն մոտեցած քաղաքացիների դեմ, ու այս ամեն անում էր Հանրապետականի հովանու ներքո՝ անպատժելիության մթնոլորտում, այժմ հայտարարում է, թե «Երկիրը ժողովրդինն է, ինչ որոշի, այն էլ պետք է անել», իսկ ինքն էլ Հանրապետական չէ։

Մանվել Գրիգորյանը երևի մոռացել է Էջմիածնում իր կողմից հաստատված ֆեոդալական կարգերն ու իր ինքնադատաստանները․ կրակոցներ, սպանություններ, ծեծ ու ջարդ, որը ներվում էր իշխող կուսակցության ներկայացուցչին․․․ մի խոսքով՝ նա Հանրապետականի «բեսպրիդել» համակարգի զավակ է ու, ինչպես Շարմազանովն է խոստովանել, ՀՀԿ զինվորը։ Էջմիածնում հաստատված վարք ու բարքին ու Գրիգորյանների հաստատած «բեսպրիդել»-ին NEWSPRESS.am-ը բազմիցս անդրադարձել է։

Հիմա այս զինվորը դավաճանում է իր կուսակցությանը՝ ասելով, թե՝ «ո՞վ է Հանրապետական, ե՞ս․․․ չէ, ես ուղղակի ֆռակցիայի ներկայացուցիչ եմ․․․»։

Երկար մտածել հարկավոր չէ թերևս՝ հասկանալու համար, որ Մանվել Գրիգորյանը դավաճանում է իր բանակը, իրեն սնող գետն ու թևեր տվողին։ Այս «բանակը» միշտ ժողովրդի դեմ է գործել, նեղացրել նրան ու ճնշել։ Ու հենց այս «բանակի» դեմ է այսօր ժողովուրդը ոտքի ելել պայքարելու, ճնշումների լծից դուրս գալու և արդարությունը վերականգնելու համար։

Ու քանի որ այս «բանակը» ժողովրդի աչքի լույսը չէ, ուստի Մանվելը կախել է գլուխն ու ՀՀԿ-ական «հերոսից» վերածվել է հասարակ «երկրապահի»՝ միայն թե չարժանանա ժողովրդի ցասմանը։

NEWSPRESS.am