«Մենք հիմա այնպիսի իրավիճակում ենք, որ ես ոչ մի բան չեմ բացառում»․ Արմեն Ռուստամյան

ՀՅԴ-ն ինչպես մինչ այս հայտարարել է, այնպես էլ կրկնում է, որ այս փուլում սատարելու է Նիկոլ Փաշինյանին։

Այդ մասին լրագրողների հետ զրույցում ասաց ԱԺ ՀՅԴ խմբակցության ղեկավար Արմեն Ռուստամյանը։ Նրա խոսքով՝ ՀՅԴ-ում գիտակցում են, որ վարչապետ դառնալուց հետո, Հայաստանում նոր իրավիճակ է ստեղծվելու, և Նիկոլ Փաշինյանի հետ զրույցն էլ գնացել է հենց այդ ուղղությամբ։

«Մեզ համար սկզբունքային մի քանի հարցի շուրջ ենք զրուցել և բովանդակային առումով էական, լուրջ տարբերություններ չկան․ սա ամենահուսադրողն է»,- ասաց Արմեն Ռուստամյանը՝ հավելելով, որ խնդիրները վերաբերել են Հայաստանի և՛ ներքին, և՛ արտաքին քաղաքականությանը։ Սակայն գոնե առայժմ Արմեն Ռուստամյանը դժվարանում է որևէ կանխատեսում անել, թե որքան ժամանակ կպահանջվի մինչև ԱԺ արտահերթ հանրաքվեն։

«Մենք չենք կարող Սահմանադրությունը ծալել, դնել մի կողմ։ Ժամկետները պետք է լինեն ողջամիտ, քանի որ այնպիսի ընտրություն պետք է լինի, որտեղ բոլորը կարող են մասնակցել, արդյունքները կգոհացնեն բոլորին․․․ Մեզ արագ ընտրությունները ձեռք չեն տալիս, պետք է ինքնանպատակ չլինի։ Ամենաարագը դա վարչապետ չընտրելն է, որը ոչ մեկին ձեռք չի տալիս»,- նշեց Ռուստամյանը։

Նրա խոսքով՝ Ընտրական օրենսգիրքը պետք է փոխվի, որը ժամանակ է պահանջում։ Հարցին, թե հնարավո՞ր է արդյոք, որ կառավարության ծրագիրը հավանության չարժանանա և արտահերթ ընտրություններն ավելի շուտ լինեն, Ռուստամյանը պատասխանեց․ «Մենք հիմա այնպիսի իրավիճակում ենք, որ ես ոչ մի բան չեմ բացառում»։

Իսկ հարցին, թե կունենա՞նք վաղը վարչապետ, թե՞ ոչ, Ռուստամյանն ասաց․

«Ես հուսով եմ․․․․»։