Նիկոլ Փաշինյանն ամփոփեց ՀՅԴ-ի հետ հանդիպումը

Քաղաքական ուժերը հասկանում են՝ կա անհրաժեշտություն քաղաքական ճգնաժամից դուրս գալու: Դաշնակցության հետ տարաձայնություններ չկան, հակադրության մասին էլ խոսք չկա: Այդ մասին այսօր Ազգային ժողովի ՀՅԴ խմբակցության պատգամավորների հետ հանդիպման ավարտից հետո ասաց վարչապետի թեկնածու Նիկոլ Փաշինյանը՝ ամփոփելով հանդիպման արդյունքները: 

«Ընդհանուր պատկերացում ունենք, թե ինչպես է պետք հանգուցալուծվի քաղաքական ճգնաժամը: Դրանից հետո իրադարձությունների մասին մտքեր փոխանակեցինք մոտեցումների փիլիսոփայության շուրջ»,- ասաց Փաշինյանը:

Ըստ նրա՝ փիլիսոփայությունը հետևյալն է՝ պետք է փորձել ստեղծել աշխատանքային մթնոլորտ:

Ինչ վերաբերում է հավանական պաշտոններին և կոալիցիոն գործընկերությանը, ապա նա նշեց, որ նման հարց չի քննարկվել:

Արդյոք եղե՞լ են ստույգ պայմանավորվածություններ հետագա գործողություններին վերաբերող: Հարցին Փաշինյանը պատասխանեց, որ հետագա գործողություններն ու զարգացումը կախված են վաղը տեղի ունենալիք իրադարձություններից: