Փաշինյանը միտքը փոխել է. «Պետք չէ փողոց փակել, պետք չէ բողոքի տրամադրություն ունենալ»

Նիկոլ Փաշինյանը Հանրապետության հրապարակում կազմակերպված հանրահավաքի ընթացքում կոչ արեց մայիսի 1-ին չիրականացնել բողոքի գործողություններ և չարգելափակել ճանապարհներ:

«Պետք չէ փողոց փակել, բողոքի տրամադրություն պետք է չունենալ, որևէ գործողություն չանել: Պետք է ժամը 11:00-ին հավաքվել Հանրապետության հրապարակում և տոնախմբություն կազմակերպել»,-ասաց Փաշինյանը՝ նշելով, որ Հանրապետության հրապարակում տեղադրված հեռուստաէկրանների վրա ցուցադրվելու է Ազգային ժողովի նիստն ուղիղ եթերում:

Նա հիշեցրեց, որ ԱԺ «Ելք» խմբակցությունն իրեն առաջադրել է որպես ՀՀ վարչապետի թեկնածու: «Առաջադրման ժամկետը սպառվելուց հետո պարզվեց, որ որևէ այլ թեկնածու չի առաջադրվել: Երեք խմբակցությունները (ԲՀԿ, ՀՅԴ, Ելք-խմբ.)հայտարարել են, որ աջակցելու են իմ թեկնածությանը, իսկ Հանրապետական խմբակցությունը նշել է, որ չի խոչընդոտի իմ ընտրությանը»,- շեշտեց Փաշինյանը:

Նա ընդգծեց նաև, որ բացարձակապես էական չէ, թե ով կլինի ՀՀ վարչապետ: «Էականն այն է, որ կա երկրի իշխանությունը սեփական ձեռքերը վերցրած ժողովուրդ: Մեր երկիրը մի վայր է, որտեղ տեղի ունեցող իրադարձությունները հիացնում են աշխարհին»,- նշեց Նիկոլ Փաշինյանը:

Հիշեցնենք, որ մինչ ԱԺ խմբակցությունների հետ այսօրվա հանդիպումները՝ Փաշինյանը կոչ էր անում մայիսի 1-ին կաթվածահար անել երթեւեկությունը մայրաքաղաք Երևանում: